110v - - - - - [continued]
Quand il ha mangé quelque chose, en le tourmentant
il le rend. Et si aprés avoir mangé quelque chose il
est ainsy pressé soubs le pied, cela le travaille fort
& luy faict mal. S’il est blessé il ne mange pas
volontiers.
Moules
Il n’y a rien mieulx pour les faire ouvrir que de les
oindre d’huile d’olif & non d’aultre. Et aprés quand
tu les veulx desjoindre, trempe les dans de l’eau
froide qui est le secret. LEt tu verras que l’huile, encores
qu’il semble estre imbu, se retirera à part comme une grasse.
Les moules se rendent plus fortes dans l’eau froide. Et
l’eau chaulde malaisement les dissouldroit, encores qu’estants
recuits, ilz soient plus maniables & aisés à dissouldre
dans l’eau.
Huile de froment
Se faict sur une lame de fer rougie au foeu. Et l’huile en
degoute, qui est propre pour oindre le poil d’un papillon ou aultre
semblable, car cet huile est incontinent sec & faict deseicher
le reste. Il fault que le poil ou la nuge de quelque animal
que tu veulx mouler soict couché, car estant debout il feroit
relever le sable & soufler.
at left middle margin
Si tu veulx mouler
quelque chose delicate,
comme une fleur de
pensée, aulcuns
pour luy donner un
peu d’espesseur
plus que le naturel,
aulcuns la frottent
de beurre. Mays il
est mieulx de l’oingdre
d’huile de froment,
car il n’ha pas de corps
& ne bouche pas
tant les petits
lineaments, et
si faict affermir
la fleur.
Gect de plomb et estaim
Pource que l’estaim veult estre gecté fort tanvre, si ta medaille,
herbe, ou aultre chose à mouler est espe tanvre & subtile, fais qu’il
y aye plus d’estaim, beaucoup plus que de plomb, sçavoir moins
que la quarte partie de plomb sur trois d’estaim. Et encores ne
mect on le plomb que pour l’alier. Au contraire, si tu veulx
mouler quelque chose forte & espesse, mays beaucoup plus
de plomb que d’estaim. Et en l’un & l’aultre tu peulx mectre
un peu d’estaim de glace, mays fort peu, avecq un peu de rousine
quand tu vouldras gecter. Despuys en moulant de plomb fin et
noeuf, j’ay mis sur une lb deulx onces d’estaim fin. Et moulant
d’estaim fin, j’y ay mis ii ℥ de plomb fin pour lb. J’ay faict des
herbes & serpents comme le naturel.
at left bottom margin
S
at left bottom margin
J’ay gecté l’estaim
presque rouge
et le plomb de
mesme, qui touteffois
n’avoict pas trop
demeuré au foeu,
car il s’y aigrist
et calcine.