110r - - - - - Mouler
Tu pourrois bien mouler sur la chose et animal desja gectée, mays il ne
vient jamays si bien que sur le naturel, avecq lequel tu peulx
faire quattre ou cinq moules.
Rocher & grotte
Il fault piler des marchasites blanches & jaulnes & diverses
sortes de mines, & puys les bien laver, affin que la partye
terrestre & pouldreuse se nettoye & qu’il ne demeure que le
grain luisant de la mine, de laquelle tu saulpoudreras
ta roche premierement couchée de colle forte, si ta grasse
grotte n’estr point pour fontaine & pour toucher eau, et
tu auras un bel ouvrage.
Serpens
Quand ils se sentent pris, ils ne mordent gueres, & n’ont pas
grand vertu de nuire si ce ne sont fort grans serpens. Le
principal est de se garder d’estre mordu plustost que l’avoir
prins, et luy ayant mis le pied dessus au plus prés du col
qu’on peult, il le fault prendre le plus prés de la teste, car
il ne sçauroit mordre s’il n’a moyen d’alonger le col & faire un
tour sinueulx & oblique, & ne s peult nuire de droicte attaque,
comme aussy il ne sçauroit marcher de droict aller, ains entortilé
en forme de S. J’ay veu que celuy qui m’aprist à les mouler
n’en faisoict aucun compte, & m’asseuroit n’y faire aultre subtilité
sinon qu’en le prenant, il le tiroit un peu pressé & acaché par
le col, & le faisant passer soubs le soulier, il l’aplatissoit de telle
sorte qu’il rendoit soubs par le fondement, qui est à cinq ou six
doitgts du bout de la queue, tout ce qu’il avoit de meschant
et veneneux dans le ventre, qu’aprés cela il n’ha point force
de mordre, et si par cas fortuit il mordoit ou rejectoit
par le fondement quelque ordure, il ne faisoit que creuser
la terre avecq un costeau & y ensepvelir sa main dans la
terre fresche & humide, laquelle apliquée fresche en sur
la partie infectée en tire tout le venin, sans aultre chose.
Aultant est il du venin du crapault, que j’ay veu experimenter.
at left middle margin
Dans trois,
il est presque
aultant
maigre qu’il
sera aprés s’il
ne mange poinct.
Le mouler le
plustost aprés
qu’il est pris
est les meilleur,
devant qu’il
s’amaigrisse.
Il ne le fault
faire mourir
qu’un quart
d’heure devant
que tu veulx
mouler.
[continued]