110r - - - - - Mouler
Tu pourrois bien mouler sur la chose et animal desja gecter Mays il ne
vient jamays si bien que sur le naturel avecq lequel tu peulx
faire quattre ou cinq moules
Rocher & grotte
Il fault piler des marchasites blanches & jaulnes & diverses
sortes de mines & puys les bien laver affin que la partye
terrestre & pouldreuse se nettoye & quil ne demeure que le
grain luisant de la mine de laquelle tu saulpoudreras
ta roche premierement couchee de colle forte Si ta grasse
grotte nestr point pour fontaine & pour toucher eau Et
tu auras un bel ouvrage
Serpens
Quand ils se sentent pris ils ne mordent gueres & nont pas
grand vertu de nuire si ce ne sont fort grans serpens Le
principal est de se garder destre mordu plustost que lavoir
prins Et luy ayant mis le pied dessus au plus pres du col
quon peult il le fault prendre le plus pres de la teste car
il ne scauroit mordre sil na moyen dalonger le col & faire un
tour sinueulx & oblique & ne s peult nuire de droicte attaque
comme aussy il ne scauroit marcher de droict aller ains entortile
en forme de S Jay veu que celuy qui maprist a les mouler
nen faisoict aucun compte & masseuroit ny faire aultre subtilite
sinon quen le prenant il le tiroit un peu presse & acache par
le col & le faisant passer soubs le soulier il laplatissoit de telle
sorte quil rendoit soubs par le fondement qui est a cinq ou six
doitgts du bout de la queue tout ce quil avoit de meschant
et veneneux dans le ventre quapres cela il nha point force
de mordre Et si par cas fortuit il mordoit ou rejectoit
par le fondement quelque ordure Il ne faisoit que creuser
la terre avecq un costeau & y ensepvelir sa main dans la
terre fresche & humide Laquelle aplique fresche en sur
la partie infectee en tire tout le venin sans aultre chose
Aultant est il du venin du crapault que jay veu experimenter
at left middle margin
Dans trois
il est presque
aultant
maigre quil
sera apres sil
ne mange poinct
Le mouler le
plustost apres
quil est pre
est les meilleur
devant quil
samaigrisse
Il ne le fault
faire mourir
quun quart
dheure devant
que tu veulx
mouler
[continued]