109v - - - - - [continued]
quand ilz veulent mordre ou manger quelque chose, ilz ne le
mordent pas de droicte attaque, ains par sinueulx retournement
& de travers, comme faict Sathan & ses suposts. Il ha la teste
petite mays le corps fort grand. L’entree du peché semble
estre petite & de peu de consequence, mays la suicte en est
fort grande. Il s’abstient de manger sept ou huict jours si
une fois il ha devoré quelque grenoille. Il en avalle bien
trois ou quattre, l’une aprés l’aultre, et ce qu’il ha devoré
ne se corrompt & consume pas tout à un coup dans son estomach,
mays p quelque partie peu à peu, sçavoir os et tout. Et le
reste se trouve aussy frais comme quand il ha devoré, de
sorte que quelque fois, qu’on le presse & tourmente, il rend
ce qu’il ha englouty, qui en partye se trouve tout consumé
& l’aultre aussy frais comme s’il estoit vif. Il tient bien
deulx ou trois heures une grenoille engloutie & la rend
toute vive.
Crapault
Si par cas fortuit tu voulois mouler ce vilain animal
& qu’il pissast en ta main, cela te feroict cuire & prurir
la main, comme si tu avoys manié des orties. Mays le
plus souverain remede pour cela est de metre la main
dans de la terre fresche & l’en couvrir comme si tu
la voulois ensepvelir. La grenoille n’est pas si belle
moulée, à cause qu’elle ha la peau vive & l’aultre l’ha grumeleuse.
at left middle margin
Tu le peulx
mouler creulx, et
luy laissant soubs
le ventre une coche
ouverte, tu le feras
saulter avecq le cordon
retors de la sye.
Ou bien, s’il est
petit, mects le sur
une pierre syderite
de sa grandeur, taillee
tanvre, puys le mects
en bon vinaigre.
at right middle margin
Quand il est grand, il le fault mouler creux, & si tu
luy veulx fayre la gueule ouverte, mects du cotton dedans,
& puys sur le cotton de la
cire fondue.
Fayre mourir serpents pour mouler
Aulcuns leur mectent une goutte d’eau fort dans la gueule,
ce qui les hebete bien, de sorte que la teste & la partie
anterieure semble estre morte, mays la gueule demeure
vive, et comme tu la piques avec l’espingle pour l’acommoder
au molle, elle se remue & gaste & deffaict tout. Donc, pour
les faire mourir toutallement, mects les dans une bouteille
dans de bon vinaigre & un peu d’eau de vye. Et fays
ainsi des lezards & aultres bestes semblables.
at left bottom margin
Si tu les veulx
garder, tu les peulx
mectre dans une
pipe pleine de terre
en un jardin, à l’air.
Mays il fault que
la pippe soict
couverte de fil d’archal,
car aultrement ilz
grimperoient & monteroient
fort hault.