108r - - - - - Pour tenir les noyaulx, aucuns employent du fil du propre
metal dont ils gectent, pource qu’il se reduict avec & fond avecq
son semblable, mays pource que en fondant ou plyant le
noyau varie, les aultres trouvent mieulx de ser servir de
fil de fer esguisé par les bouts, pource qu’il tient plus ferme,
& ayant les bouts subtils, ne paroist non plus qu’une pointe
d’aiguille. Et on le peult dorer ou argenter plustost que le
mectre en oeuvre. S’il faict trou, on le recouvre avecq un petit ciseau.
L’eau de vye empesche que le sable ne soufle point & ne faict
point aulx borts du moule de petits trous si la chose à mouler
en est bien mouillée. Les trous & vesces & souflements ne se font
poinct à l’endroict du moule qui est espés, mays aulx borts qui
sont plus deliés.
On gecte d’argent commun de quoy les orfevres vulgairement
travaillent, qui est allié Et que mediocrement. Et quand
on gecteroit de souldure, il courroit encores mieulx.
Le spat est une pierre blanchastre qui se trouve en
Allemaigne, & principallement a Auguste, de quoy on se sert pour
le plus excellent sable qui se puisse trouver pour plomb,
estain, cuivre, argent & or. Et tant plus il sert, tant plus
il est meilleur. Il est propre pour gecter en chassis choses
plattes. Pour choses rondes, il n’est pas si duisant ne
si tenant au feu que le susdict composé de plastre.
Les retailleures de cui gros cuir gras sont pbons à gecter
dans le cuivre et latton fondu, car il le nettoye & luy oste
toute sa crasse.
Spalt
Le spalt est blanc comme plastre cuict, et se trouve en monceaulx
et pierres faictes à longues escailles & longs filets. Il est fort tendre,
de sorte qu’avecq l’ongle on le peult racler & en faire pouldre comme
de nostre croye de Champaigne. Et pource que toute chose qui provient
de la terre est mellée de quelque aultre substance, pour le
purifier on le broye, venant de la pierrerie, assés grossierement puys
on le destrempe avecq de l’eau de sel armoniac. En mectant la
grosseur d’une noix d’iceluy dans une grande bouteille d’eau, et
[continued]