Making and Knowing
A minimal edition of BnF Ms Fr 640

[TOC] | [translation]

- - - - - folio image: 108r - - - - -

Pour tenir les noyaulx aulcuns employent du fil du propre
metal
dont ils gectent
pource quil se reduict avec & fond avecq
son semblable Mays pource que en fondant ou plyant le
noyau varie Les aultres trouvent mieulx de ser servir de
fil de fer esguise par les bouts pourcequil tient plus ferme
& ayant les bouts subtils ne paroist non plus quune pointe
daiguille Et on le peult dorer ou argenter plustost que le
mectre en oeuvre Sil faict trou on le recouvre avecq un petit ciseau

Leau de vye empesche que le sable ne soufle point & ne faict
point aulx borts du moule de petits trous si la chose a mouler
en est bien mouillee les trous & vesces & souflements ne se font
poinct a lendroict du moule qui est espes Mays aulx borts qui
sont plus delies

On gecte dargent commun de quoy les orfevres vulgairement
travaillent qui est allie Et que mediocrement Et quand
on gecteroit de souldure il courroit encores mieulx

Le spat est une pierre blanchastre qui se trouve en
allemaigne & principallement a Auguste de quoy on se sert pour
le plus excellent sable qui se puisse trouver pour plomb
estain cuivre argent & or. Et tant plus il sert tant plus
il est meilleur Il est propre pour gecter en chassis choses
plattes pour choses rondes il nest pas si duisant ne
si tenant au feu que le susdict compose de plastre

Les retailleures de cui gros cuir gras sont pbons a gecter
dans le cuivre et latton fondu car il le nettoye & luy oste
toute sa crasse

Spalt

Le spalt est blanc comme plastre cuict Et se trouve en monceaulx
& pierres faictes a longues escailles & longs filets il est fort tendre
de sorte quavecq longle on le peult racler & en faire pouldre comme
de nostre croye de champaigne Et pourceque toute chose qui provient
des la terre est mellee de quelque aultre substance pour le
purifier on le broye venant de la piererie asses grossierement puys
on le destrempe avecq de leau de sel armoniac En mectant la
grosseur dune noix diceluy dans une grande bouteille deau Et

[continued]