Making and Knowing
A minimal edition of BnF Ms Fr 640

[TOC] | [translation]

- - - - - folio image: 104v - - - - -

Contre la galle des chiens

Une demy ℥ de staphisagrie pour les chiens
communs & une ℥ pour les grands en pouldre subtile
battu avec deux blanc dhuile doeufs & un quarteron
dhuile leur faire boire a ieun les ayant tenus
la nuit enfermes sans manger @Aprouve

Pour gect

Si tu as quelque piece qui ne soict point de despouille &
grande moule la avec de la cire soict cave ou relief pourceque
elle preste estant molle & obeist et ainsy se separe de la piece
sans y rien laisser mays advise que la cire fondue ne soict
ne trop chaulde ne trop froide Aulcuns moulent avec de la
cire eschaufee dans de leau chaulde Mays en pressant le
moule se gaulchist & se faict faulx Quand tu as le cave de
cire tu y peulx gecter de lardille fort doulce & fort destrempee
& claire & laisse secher a laise Puys tu feras un cave
la dessus ave de plomb ou estaim dans tu lequel ce que tu
formeras sera de bonne despouille

Orfevre

Scaiches que cest que travailler le pailleterie cest
des escailles dargent pur & dargent dore de quoy on faict
les hoquetons des archiers

Espinette jouant toute seule

Figure at left bottom margin Figure

Fais un axe tout entourne de roues percees tout aultour
en lespesseur et attaches des plumes comme pour cistre ou
espinette & les dispose selon la chancon que tu vouldras
faire dire y laissant telle distance convenable Et tournant
laxe ou par toymesme ou par ressort dhorloge ton invention
seffectuera