104r - - - - - Pour manger et dissouldre l’or tout pur
Recipe: Mects du sel commun dans de l’eau fort en un matras,
et le laisse reposer deux heures sans le mectre sur le foeu.
Mectés y l’or fort tanvre, et le tirés comme s’il avoict esté
desparty d’argent.
Pour graver sur fer
Une ℥ de verdet, ii ℥ de gros sel & un peu de sublimé,
ou aultrement broye du massicot avecq huile de lin et
uen couvre la lame ou fer bien net & poly, & laisse seicher
au foeu ou au soleil, et tire dessus ce qu’il te plaira.
Puys, pour le graver & faire l’eau, prens pour un liard
de verdet & mects deulx fois aultant de gros sel & environ
quattre grains de sel armoniac & six grains de sublimé,
& fault que l’eau ne soict pas chaulde.
Bonne saulce a colorer l’or
Soufre & gravelle, aultant d’un que d’aultre, & la tierce
partie de soufr sel, & aultant de terra merita que de
soufre.
Argenter sur cuivre et letton
Mollés l’argent comme l’or & le charger comme si vous vouliés
dorer. Et ne le laisse chaufer, que l’argent ne se ternisse
point. Et aprés qu’il sera bien chargé, bouillés le en huile
de noix & aprés chaufés le un peu & le bouttés en boutteure
doulce.
Esmailler une cornaline
Destrempe de la fleur de froment avecq du vin blanc, puys
en barboille & couvre toute la cornaline. Et recuis la violette,
aprés mects la tremper dans du vin blanc une heure ou deulx,
puys gratte la & laisse ce que tu vouldras espargner dessus,
puys la recharge encores un peu dessus.