103v - - - - - Clistere
Affin que le tuyau n’offense poinct, comme les enfans
ou ceulx qui se ont les veines hemorroïdales eminentes
ou enflées, on revest le bout du canon d’un lopin de boyau
de poulet & on le replye par le bout, & en ceste sorte
on donne le clistere.
Gect
L’estaim se retire estant espés, par ainsy il est
mieulx de le gecter tanvre & d’une piece en faire
deulx puys les soulder, si besoing est. On se sert
d’un taffetas fort pour passer le sable subtil, duquel
on couvre premierement la medaille de l’espesseur d’un
teston.
Pour fayre courre les
couleurs
Mesle du vinaigre avecq un peu avecq du fiel
& le p mects dans une bouteille de verre; & si tu le
veulx garder long temps, mects y un peu de sel, & de
cela meslés en parmy vos couleurs & cela les fera
courre.
Suif d’oreille
Si tu en prens assés au bout d’un cure aureille
& le passe par l’escume de l’urine qui se faict volontiers
par ceulx qui ont mal de teste, toute l’escume se dissipera.
Esmauls
Pour cognoistre bien leur difference et leur vraye
couleur à la chandelle, il fault mectre ta chandelle
derriere un mirouer de cristal ou un globe ou bocal
de verre plein d’eau, car ce jour est semblable à celuy
du soleil.