103r - - - - - Contre bruslure, excellent
Chaufe de l’huile de lin a foeu doulx, sans qu’il bouille &
fremisse, mays comme il sera chault mects y le quart d’icelle
de la plus noeufve cire que tu pourras. Estants fondus,
laisses les refroidir, & comme ilz commanceront à se cailler, remue
tousjours avecq une spatule de bois noeuf tant que tu mettras
à dire 9 pater noster, et comme tu les diras, lave ceste composition
avecq de l’eau beniste, tousjours remuant. Ayant dict les
premiers 9 pater noster, verse la premiere eau & y en remects
de nouvelle, & lave & remue la composition l’espace que tu diras
8 pater noster, à la 3 l’espace de 7, & ainsy consequemment
jusques tu adjousteras nouvelle eau, faisant comme dessus jusques
au dernier & seul pater noster de noeuf. Lors tu auras un
onguent blanc & doulx, duquel tu oingdras la brusleure
l’espace de 9 jours. Mays n’y en mects pas d’advantage,
car il te faeroit surcroistre la chair. Tu p te penseras
deulx foys le jour & à chasque foys tu te laveras le visaige
avecq eau & vin meslés ensemble un peu tiedes, sans frotter
mays comme le pressant avecq un linge mouillé, et tu l’essuyeras
de mesme aff avecq un linge deslié; & aprés mects l’unguent,
sur lequel tu pourras mectre des foeilles de lierre. Cecy
faict renaistre le poil & ne laisse poinct cicatrice. Un
pouldrier, qui s’estoit presque tout bruslé m’a & qui n’avoict
aulcune aparence de brusleure me l’a enseigné.
Contre la galle des chiens
Les Anglois, qui caressent fort les chiens pour le
soin qu’ils ont de leur bestail, ont des penseurs d’iceulx
qui non ont particuierement cet office. Et faisant fondre de
la pegue dans de l’eau & l’y laissant tremper, frottent les
chiens de ceste eau, ou bien avecq de l’eau de sublimé.