103r - - - - - Contre bruslure excellent
Chaufe de lhuile de lin a foeu doulx, sans quil bouille &
fremisse Mays comme il sera chault mects y le quart dicelle
de la plus noeufve cire que tu pourras Estants fondus
laisses les refroidir & comme ilz commanceront a se cailler remue
tousjours avecq une spatule de bois noeuf t tant que tu mettras
a dire un 9 pater noster. Et comme tu les diras lave ceste composition
avecq de leau beniste tousjours remuant Ayant dict les
premier 9 pater noster, verse la premiere eau & y en remects
de nouvelle & lave & remue la composition lespace que tu diras
8 pater noster A la 3 lespace de 7 & ainsy consequemment
jusques tu adjousteras nouvelle eau faisant comme dessus jusques
au dernier & seul pater noster de noeuf Lors tu auras un
onguent blanc & doulx duquel tu oingdras la brusleure
lespace de 9 jours Mays ny en mects pas dadvantage
Car il te faeroit surcroistre la chair Tu p te penseras
deulx foys le jour & a chasque foys tu te laveras le visaige
avecq eau & vin mesles ensemble un peu tiedes Sans frotter
Mays comme le pressant avecq un linge mouille Et tu lessuyeras
de mesme aff avecq un linge deslie & apres mects lunguent
Sur lequel tu pourras mectre des foeilles de lierre Cecy
faict renaistre le poil & ne laisse poinct cicatrice Un
pouldrier qui sestoit presque tout brusle ma & qui navoict
aulcune aparence de brusleure me la enseigne
Contre la galle des chiens
Les Anglois qui caressent fort les chiens pour la
soin quils ont de leur bestail ont des penseurs diceulx
qui non ont particuierement cet office Et faisant fondre de
la pegue dans de leau & ly laissant tremper frottent les
chiens de ceste eau ou bien avecq de leau de sublime