102v - - - - - Paindre sur cristal ou verre
Ils peignent sans traicts à huile si ce n’est aulx visaiges,
ou ilz marquent le nez & la bouche en petit ouvraige avecq du
noir, puys ilz font les touches & rehaulsements de blanc,
aprés ilz couchent tout de carnation. Et quand aul fonds, ilz
le font d’azur d’Acre pour plus beau, ou de laque pour rouge
plus tost faict, ou de sang de dragon pour le plus beau.
Mays il le fault coucher peu à peu affin qu’il se monstre uny
& tout d’une couleur, & ainsy des aultres couleurs. Aprés
ilz mectent dessoubs une foeille de topasse ou une d’or
ou d’argent
Infusion d’anthos ou rosmarin
Au mois d’aougst la fleur est mieulx cuicte & plus propre
à fayre huile, prens en telle quantité qu’il te plaira,
et la mects dans une bouteille bien aprés bouchée & laisse
fanir à l’ombre là dedans un jour, puys mects y de
la premiere substance de vin & la laisse reposer trois ou
quattre jours. Et exprime aprés le tout dans un aultre
vaisseau, & dans ceste mesme substance de vin mects y sept
ou huict infusions de nouvelles fleurs. Aprés laisse au
soleil la derniere infusion un moys. Aprés distille la
par alenbic, et de ceste eau prens en ii ℥ dans
deulx ou trois cuillerées de vin blanc. Mays c’est pour
les vieulx. Paul tiers en usoit.
Gect
L’estain vient mieulx estant tanvre & subtil qu’espés,
pource que estant espés & en grand chaleur, il se ressere.
Doncq si tu veulx mouler en estaing quelque piece espece,
moule la seulement dun costé & cave d’un costé s’il est possible,
en ceste sorte tu l’auras plus nette, et puys tu pourras
souldre deulx moictiés ensemble. Mays si tu es contrainct
de le mouler espés, fais en la forme & moule force
abrevouers aultour de la figure en ceste sorte.
Figure
