099r - - - - - [continued]
La terre ou sable mouille ou broye avecq eau veult estre
plus recuite que le sable
Le letton de chandelier nest pas pur car ony mesle
de la limaille & du potin
Le letton veult estre gecte plus chault que le cuivre
quod non credo
Il ne fault pas pour gecter curieusement prendre tous
metaulx alies Mays les prendre pur & les mesler
Le fer ne saccorde gueres a gecter dans lung du cuivre
ou letton
Il est mieulx de mouler tout dun sable soict en chassis
ou noyau quen divers mesles
at left top margin
Il fault recuire
a foeu quide charbon
qui sallume de
soy mesme le crusol
une ou deulx heures
et p avecq la
matiere dedans
Et puys soufler
& couvrir le crusol
de gros charbons
& la gueule du
fourneau de briques
Et laisser consumer
deulx ou trois
mises de charbon
qui se remplissent
le fourneau par
dessus le crusol
en fin donner foeu
de chasse & comme
la flame sera fort
blanche & que la
matiere sera en
bain liquide comme
eau & gectant des
flammes de bleu
pasle gecte
Le secret est de
gecter bien fort chault
& a coup
Sable blanc maigre
sans liaison se rend fort
propre pour le gect & ayant corps se tu le broyes fort
subtil sur le porphire ou le calcine le rougissant plusieurs
foys au foeu & estant en vinaigre ou subtillie avecq leau
comme tu scais Il moule aussy fort net en noyau Comme jay
experimente Mays ne le destrempe pas avecq eau sel si tu
le veulx promptement recuire Car le sel bouillonne au foeu
& faict des pustules estant presse du foeu Je croy que
les noyaulx recuits a laise ne feroient pas cela Je y ay
moule fort net en noyau matiere de poelonne Le sable blanc
sent le soufre comme il se recuit et croy quil se fondroit Et
comme la matiere a este gectee dedans il adquiert dans le
moule comme un lustre comme sil estoit plombe ou vitrifie Je croy
que les verriers sen pourroient servir
at left middle margin
Il fault fort
peu de sel armoniac
dissoult dans leau
Anses de cloches
Elles se peuvent bien remectre sans refaire la cloche
laquelle il fault remectre dans la fosse & le moule dedans
Mays soulder la cloche ref fendue il est estime impossible
pour luy donner sa premiere voix