098v - - - - - Petis chiens
Les petits chiens qui doivent estre barbets se cognoissent
à ce qu’ilz ont le moeufle plus gros que les aultres.
Artichauts salés
On les mect entiers & non trop faicts en un barricot
qu’on emplist de saulmure. Puys on les sert tout l’an
parmy les salades, crus avecq huile & vinaigre, car estant
ainsy preparés ilz sont longs à cuire. Mays advise
d’experimenter ta saulmure avecq un œuf car si elle est
bonne & assez forte, l’oeuf nagera dessus. Sinon elle n’est
pas assés forte et ne conserveroit pas les fruits.
Abres
Qui portent bien tost fruit se viellessent et ne durent
gueres.
Oyseaulx
Qui ont esté nourris à la broche ne siflent pas parmy les
aultres en compaignee s’ilz ne sont en une cage à part.
Pour les bien aprendre à sifler, il les fault prendre au
nid plustost qu’ils ne voyent & les couvrir de duvet ou d’une
peau de lievre. Ainsy, n’ayant point veu leur pere et cogneu
sa voix, ilz aprenent mieux le sifler qu’on leur enseigne.
Fonte
La potée se faict de terre bruslée qui a servy à la fonte,
c’est terre bourre bolvene dans laquelle on l’a fondu. On la
broye sur une grande pierre, & de celle là on en faict la chappe
des premiere couche de la chape des cloches où il y ha
lettres & ouvrages, & le n’ha besoing que d’estre recuite à la
flambe de la paille, et moulle fort net.
La terre qui moule en noyau est subgecte à soufler si tu
ne frottes fort avecq la broisse ou le doigt sur la piece
mouler qui soit bien huilée. Et fais couches à couches & non
en un coup.
[continued]