098r - - - - - Vernis pour les luts
Ils prenent un peu de tormentine & huile de tormentine ou daspic & de
lambre pulverise & passe fort subtillement & font comme celuy de mastic & y
adjoustent pour le colorer un peu de sang de dragon pour le faire
rougeastre Et aultres de la terra merita pour iaulne
Bords de Jardin
Il fault labourer la terre puys la subtilier avec le rateau Et apres
si elle est seche il la fault humecter Puys estandre le cordeau
tout au ras Et fraper sur tout le long du cordeau as avecq le dos
de la tranche Affin que le cordeau marque une ligne droicte Le
long de laquelle tu feras un bord des trous avecq le picquet de fer
ou tu planteras ton rosmarin esteste & coupe de mesure et effoeille par
le pied
Sarrurier
Pour bien estamer des cloux et aultre ouvrage Ils liment bien
nettement leur ouvraige puys pour le bien nettoyer & desgraisser il
le font bouillir dans du vinaigre Puys lessuyent bien avecq un
linge Apres le font chaufer & passent par dessus de la rousine
qui linduist dune peau luisante comme vernis Ce faict ilz font fondre
de lestaim pur & fin dans leur estamiere qui est une petite caisse de
fer quarree Et comme lestain est bien fondu & mediocrement chault ilz y
gectent de la rousine pour brusler la crasse & puys y laissent un peu
tremper la teste du clou ou chose semblable & y ayant demeure sept
ou huict pauses ilz le tirent et le secouent frapant dessus avecq quelque
fer pour fayre tumber lestain qui est superflu & le nettoyent avecq
un petit baston entourne destoupes Et sil nest bien estame tu le
frotteras ton chault avecq une piece de rousine & feras comme devant
& laisseras froidir Quand louvrage se froidist il vient iaulne qui
est signe que lestain est en bonne chaleur Mays il vient bleu si lestain
est trop chault Les t choses ainsy estamees sont de duree & ne se
deffont point comme lestamure faycte de foeille Ains au bout dun
an se peulvent esclarcir & renouveller les chaufant & frottant
Les plombeurs disent que faisant mourir un lesard dans lestain
fondu il des que lestamure en vient fort doree Ou bien y mectant
du sel armoniac