097v - - - - - Vernis de mastic sec en demye
heure
Aulcuns prenent 2 ℥ de mastic, demye ℥ de tourmentine & demye ℥
de huile de tourmentine & de l’eau de vye, un peu a discretion, pource que
chaufant elle s’esvapore & faict neantmoins le vernis plus desiccatif.
Mays je l’ay faict ainsy: je prens de l’huile de tourmentine à
discretion & y mects bien peu de tormentine, pource que elle demeure
tousjours humide & s’attaque si on en y mect trop, & de l’eau de vye,
& fais chaufer dans une escuelle vernissée ledict huile, & comme il
commence a estre bien chault, je y mects du mastic subtillement pulverisé
& passé par un tamis lenviron la troisiesme partye de l’huile,
et laisse reschaufer jusques a ce qu’il soict fondu, qui sera
bien tost sur les cendres chauldes. Estant tout fondu, fays en
essay sur le costeau, et si tu voys qu’il aye trop de corps, adjoustes
y un peu d’huile de tourmentine, et s’il n’en ha pas assés, adjoustes
y du mastic, et ainsy il sera faict. Et tiens le bien couvert
affin qu’aulcune ordure n’y entre. Quand tu en vouldras faire,
soys curieulx de trier & choisir le mastic qui soict blanc & purifié
de toute terre & poulsiere & mache noire. Et quand tu le laveras &
feras seicher pour le rendre bien blanc & bien net, il n’en sera que
mieulx. Car si tu ne le purges bien, ces festus & marques, se pulverisant
parmy, demeureront aulx vernis, & comme tu l’assoyras sur quelque blanc
ou carnation, il semblera que ce soient pulces & taches. Estant
bien choisi, pulverise le dans un mortier et le passe par un tamis
fort subtil, et aprés mesle le dans l’huile comme dict est. Mays si
tu en voulois faire plus curieusement, tire la larme du mastic comme
tu sçais, pulverise, passe & mesle, et tu auras chose tre singuliere
pour petits ouvrages. Advise bien en vernissant de ne halener pas
dessus, car cela feroit blanchir & prendre corps au vernis.
at left top margin
Il deseiche presque en travaillant.
at left top margin
On cognoist que ce
vernis n’ha point de
corps assés quand il
ne prend pas bien
sur le tableau à huile
car il est comme eau.
Adjoustes y doncq
du mastic pulverisé
& chaufe jusques à
ce qu’il soit bien.
Ce vernis est fort
blanc & beau, & n’enteste
point comme celuy
d’aspic.
at left middle margin
Car aulcuns, au lieu
de tour huile de
tourmentine, mectent
huile d’aspic, qui n’est
pas si bon.
at left middle margin
Ce vernis se pose
à froid sur le tableau
avecq le bout du doigt
bien net, & le fault
estendre bien vivement.
at left middle margin
Les Italiens ne
vernissent gueres leur
painctures pource qu’ilz
couchent leurs painctures
fort espesses & ne sont
de long temps seiches
au dedans, bien que
dessus elle fassent
une peau & croste
seiche.
at left middle margin
On couche le vernis
avecq le doigt affin
de le coucher maigre,
car estant espés, il jaulnist.
Travailler d’aprest
C’est une chose estrange que les ouvriers de cest art ne
peuvent bien travailler s’ils n’ont bonne halene, car s’ils l’ont
mauvaise leur ouvrage se rompt au foeu en recuisant