097r - - - - - Le vernis noir
Il est dict, au commencement du livre ou tu le peulx voyr, qui se
faict avecq du gallipot.
Dorer
On apreste fort les gardes avecq la lime doulce, fort doulce, de
sorte qu’en toutes les gardes il n’y aye rien de noir, et aprés les
chaufer & passer comme dict est. Mays pour dorer & argenter, il ne fault
pas qu’elles passent, sinon un petit le bleu. Puys pendant que les gardes
sont chauldes, on les attache à l’estoc, & avecq des pincettes, on couche
l’or & on le faict assoir avecq la sanguine bien nette & frottée avecq de
la pottée. Et comme les gardes sont froides, on les faict reschaufer,
puys on couche l’or comme dessus. Et on donne de premierement deulx
couches jusques à ce que toute la garde soict bien garnie. Et aprés,
on reschaufe comme au commancement, & on donne la troisiesme couverture
d’or. Puys on brunist avecq une grosse sanguine bien fort & avecq
bonne force. Et Mays note que pour bien brunir, il fault que tousjours
la garde soit chaulde. Et pour le sçavoir, on la sent & on l’aproche
du nes. Car il ne la fault pas toucher avecq les doigts, ains on la
tient sur releve de dessus les cendres chauldes avecq une vergette de
fer, qui est faicte exprés pour entrer dans l’oeil de la garde. Et quand
elle est achevée de bien brunir, on la frotte fort bien avecq un linge
blanc, et fault que l’or soict plus espes & plus fort que pour les
painctres. Le quarteron compte cinquante ou LX sols.
Argenter
Il fault aprester les gardes & les blanchir avecq une lince lime
un peu plus rude pour que pour l’or. Et on les faict passer le gris comme
pour dorer. Et comme elles sont chauldes, il fault doubler la foeille
d’argent puys les despartir avecq un costeau, aprés en charger la
garde avec un petit les pincettes & un petit brunisson, et puys les
faire reschaufer & charger jusques à ce qu’elles soient toutes argentées.
Aprés il les fault charger pour la troisiesme foys, la foeille en
double comme dict est, puys les brunir bien fort & avecq force,
non avecq la sanguine, mays avecq un fort brunisson. Tout
ainsy qu’il ne fault pas que le brunisson brunisse l’or.