097r - - - - - Le vernis noir
Il est dict au commencement du livre ou tu le peulx voyr qui se
faict avecq du gallipot
Dorer
On apreste fort les gardes avecq la lime doulce fort doulce de
sorte quen toutes les gardes il ny aye rien de noir Et apres les
chaufer & passer comme dict est Mays pour dorer & argenter il ne fault
pas quelles passent sinon un petit le bleu Puys pendant que les gardes
sont chauldes on les attache a lestoc & avecq des pincettes on couche
lor & on le faict assoir avecq la sanguine bien nette & frottee avecq de
la pottee Et comme les gardes sont froides on les faict reschaufer
puys on couche lor comme dessus Et on donne de premierement deulx
couches jusques a ce que toute la garde soict bien garnie Et apres
on reschaufe comme au commancement & on donne la troisiesme couverture
dor Puys on brunist avecq une grosse sanguine bien fort & avecq
bonne force Et Mays note que pour bien brunir il fault que tousjours
la garde soit chaulde Et pour le scavoir on la sent & on laproche
du nes Car il ne la fault pas toucher avecq les doigts ains on la
tient sur releve de dessus les cendres chauldes avecq une vergette de
fer qui est faicte expres pour entrer dans loeil de la garde Et quand
elle est achevee de bien brunir on la frotte fort bien avecq un linge
blanc Et fault que lor soict plus espes & plus fort que pour les
painctres Le quarteron compte cinquante ou LX sols
Argenter
Il fault aprester les gardes & les blanchir avecq une lince lime
un peu plus rude pourque pour lor Et on les faict passer le gris comme
pour dorer Et comme elles sont chauldes Il fault doubler la foeille
dargent puys les despartir avecq un costeau Apres en charger la
garde avec un petit les pincettes & un petit brunisson Et puys les
faire reschaufer & charger jusques a ce quelles soient toutes argentees
Apres il les fault charger pour la troisiesme foys la foeille en
double comme dict est Puys les brunir bien fort & avecq force
non avecq la sanguine Mays avecq un fort brunisson Tout
ainsy quil ne fault pas que le brunisson brunisse lor