096v - - - - - Gardes grises
Il ne les fault, estant blanches, que les bien nettoyer, puys les
mectre au foeu & les faire passer bleu. Et fault bien prendre
garde qu’ilz ne passent pas trop le bleu, car ne l’or ne l’argent
ne aultre couleur n’y prendroit pas. Pour ce faire, qui est
appellé les faire passer, on ha un chaulderon plein de cendres
qu’on couvre de charbon fort allumé, & les faict on chaufer ainsy
bien fort une heure ou deulx, et comme les cendres sont fort chauldes,
on tire le charbon d’un costé & on mect la garde au lieu où estoit
le charbon & on la couvre toute de cendre. Et quand le corps
de la garde, qui est le principal, est tout passé, on revire la
garde par l’aultre costé, et en ceste sorte le gris ne peult pas
trop passer, si quelque charbon allumé n’y touche. Le gris se
peult bien faire au feu commun de la cheminée, mays il y a
danger qu’il ne passe trop & ne fasse une crasse qui l’empescheroit
de prendre couleur. Le bleu se faict incontinent que la cendre
a un peu chaufé les gardes, mays il est tousjours gris de
quelque costé. Aprés le bleu vient le gris.
Couleur d’eau
Pour couleur d’eau, on passe la lime doulce sur les gardes pour les
blanchir, puys le brunisson. Aprés, on les faict passer bleu
jusques à ce qu’elles viennent grises. Aprés, comme elles sont encore
mediocrement chauldes, on passe la sanguine par dessus, et comme
elles se froidissent, on les tourne à reschaufer, car la couleur
d’eau ne se faict qu’à plusieurs foys. Et si les gardes n’estoient
chauldes, la sanguine rascleroit & defferoit la couleur. Il fault
adviser que les gardes ne passent pas trop le gris, car elles
gecteroient une crasse qui empecheroit de prendre la couleur.
Il fault presque un jour pour aprester, adoulcir & mectre en
couleur d’eau, mays qu’elles soient un peu passées bleu, c’est assés
pour le gris & aultre couleur. Le gris est la moingdre couleur
aprés le vernis qui est de deulx couleurs, ou jaulne ou noir.
Vernis jaulne
On blanchist bien fort & on nettoye bien les gardes. Aprés
on les charge à froid avec une plume toutes d’huile d’olive de
noix, et aprés les tourner sur un bon foeu de charbon qui est sur
le fourneau des fourbisseurs, sans qu’elles touchent au charbon
ne à la cendre. Et quand elles ne fument plus, c’est faict.