096v - - - - - Gardes grises
Il ne les fault estant blanches que bi les bien nettoyer puys les
mectre au foeu & les faire passer bleu Et fault bien prendre
garde quilz ne passent pas trop le bleu Car ne lor ne largent
ne aultre couleur ny prendroit pas Pour ce faire Qui est
appelle les faire passer On ha un chaulderon plein de cendres
quon couvre de charbon fort allume & les faict on chaufer ainsy
bien fort une heure ou deulx Et comme les cendres sont fort chauldes
on tire le charbon dun coste & on mect la garde au lieu ou estoit
le charbon & on la couvre toute de cendre Et quand le corps
de la garde qui est le principal est tout passe on revire la
garde par laultre coste Et en ceste sorte le gris ne peult pas
trop passer si quelque charbon allume ny touche Le gris se
peult bien faire au feu commun de la cheminee Mays il y a
danger quil ne passe trop & ne fasse une crasse qui lempescheroit
de prendre couleur Le bleu se faict incontinent que la cendre
a un peu chaufe les gardes Mays il est tousjours gris de
quelque coste Apres le bleu vient le gris
Couleur deau
Pour Couleur deau on passe la lime doulce sur les gardes pour les
blanchir puys le brunisson Apres on les faict passer bleu
jusques a ce quelles viennent grises Apres comme elles sont encore
mediocrement chauldes on passe la sanguine par dessus Et comme
elles se froidissent on les tourne a reschaufer Car la couleur
deau ne se faict qua plusieurs foys Et si les gardes nestoient
chauldes la sanguine rascleroit & defferoit la couleur Il fault
adviser que les gardes ne passent pas trop le gris car elles
gecteroient une crasse qui empecheroit de prendre la couleur
Il fault presque un jour pour aprester adoulcir & mectre en
couleur deau Mays quelles soient un peu passees bleu cest asses
pour le gris & aultre couleur Le gris est la moingdre couleur
Apres le vernis qui est de deulx couleurs ou jaulne ou noir
Vernis jaulne
On blanchist bien fort & on nettoye bien les gardes Apres
on les charge a froid avec une plume toutes dhuile dolive de
noix Et apres les tourner sur un bon foeu de charbon qui est sur
le fourneau des fourbisseurs sans quelles touchent au charbon
ne a la cendre Et quand elles ne fument plus cest faict