096r - - - - - [continued]
plane ronde, manchée aussy à deulx manches, puys avecq
une petite plane estroicte on la cave & recure demy pied vers
le bout du talan. Et le plus court est le meilleur dans ce
recurement, l’espée couperoit tousjours le fourreau.
L’entrée du fourreau s’apelle l’embouscheure, & dessus est
la forme du costeau.
L’arrest, qui est un bort de cuir eslevé sur le bord de la
forme du costeau, se faict pour arrester les pendants.
Quand les estelles sont bien aplanies, on couche l’espée
dessus, & avecq de la pierre noire on marque la largeur
de la lame & la longeur, & puys avecq un ciseau on coppe
le superflu. Et on y passe un ribot pour bien unir selon la
marque.
Aprés on colle les deulx estoilles bort contre bort et tout aultour, seulement aultant
que dure la forme du costeau & non ailleurs. Et c’est pour faire
tenir le cuir du velours du fourreau.
Puys on mect l’espée dans les estelles. Et tout ainsy ilz
l’enchassent dans le fourreau qui est tout cousu, et frottent
ce qui est collé à droit la forme du costeau avec du suif
pour le faire couler dans le fourreau.
Le fourreau se faict de cuir de veau ou de mouton, tout d’une
piece celles de veau, mays celles de mouton nenny. Ains, quand
les espées sont longues, on les faict de pieces qui se cousent
entre cuir & chair, & puys frottent fort la cousture avecq un
loppin de buys pour la couvrir & unir. D’une belle peau de veau
il se tire viii ou noeuf ou x fourreaulx. Un ouvrier en peult
aysement faire vi par jour. S’ilz sont trop espés, on les pare
un peu avecq la plane. Et si la peau est dure, on la trempe
dans de l’eau tiede legerement, et on ne l’y laisse gueres. Apré s
celuy mesme qui ha faict le boys doibt adapter le fourreau pour
estre bien faict. Il est vray que pour communes gens on en tient
bien de touts faicts, mays ils ne se portent jamays si bien.
Quand le fourreau est faict & cousu de filet noir, on le frotte avecq
un bois de buy ou avec un linge, l’ayant un peu induict d’huile.
Le fourreau de bonne vache est meilleur que tous et couste plus aussy
excepté le velours. Sous le velours on mect communement une simple toile
ou un fourreau de mouton ou une couverture de parchemin. Mays
le meilleur fourreau de tous est un fourreau enciré, soict de velours
ou de veau. C’est qu’on couvre le boys d’une toile deliée, laquelle aprés
on cire, puys on la couvre de velours ou de veau. Un fourreauenciré
vault bien xxx sols, un de vache xx sols.
at left bottom margin
d’une peau de
mouton v ou vi.