096r - - - - - [continued]
plane ronde manchee aussy a deulx manches puys avecq
une petite plane estroicte on la cave & recure demy pied vers
le bout du talan Et le plus court est le meilleur dans ce
recurement lespee couperoit tousjours le fourreau
Lentree du fourreau sapelle lembouscheure & dessus est
la forme du costeau
Larrest qui est un bort de cuir esleve sur le bord de la
forme du costeau se faict pour arrester les pendants
Quand les estelles sont bien aplanies on couche lespee
dessus & avecq de la pierre noire on marque la largeur
de la lame & la longeur & puys avecq un ciseau on coppe
le superflu Et on y passe un ribot pour bien unir selon la
marque
Apres on colle les deulx estoilles bort contre bort et tout aultour seulement aultant
que dure la forme du costeau & non ailleurs Et cest pour faire
tenir le cuir du velours du fourreau
Puys on mect lespee dans les estelles Et tout ainsy ilz
lenchassent dans le fourreau qui est tout cousu Et frottent
ce qui est colle a droit la forme du costeau avec du suif
pour le faire couler dans le fourreau
Le fourreau se faict de cuir de veau ou de mouton tout dune
piece celles de veau Mays celles de mouton nenny ains quand
les espees sont longues on les faict de pieces qui se cousent
entre cuir & chair & puys frottent fort la cousture avecq un
loppin de buys pour la couvrir & unir Dune belle peau de veau
il se tire viii ou noeuf ou x fourreaulx Un ouvrier en peult
aysement faire vi par jour. Silz sont trop espes on les pare
un peu avecq la plane Et si la peau est dure on la trempe
dans de leau tiede legerement Et on ne luy laisse gueres Apres
celuy mesme qui ha faict le boys doibt adapter le fourreau pour
estre bien faict Il est vray que pour communes gens on en tient
bien de touts faicts Mays ils ne se portent iamays si bien
Quand le fourreau est faict & cousu de filet noir on le frotte avecq
un bois de buy ou avec un linge layant un peu induict dhuile
Le fourreau de bonne vache est meilleur que tous et couste plus aussy
excepte le velours Sous le velours on mect communement une simple toile
ou un fourreau de mouton ou une couverture de parchemin Mays
le meilleur fourreau de tous est un fourreau encire soict de velours
ou de veau Cest quon couvre le boys dune toile deliee laquelle apres
on cire puys on la couvre de velours ou de veau Un fourreau en cire
vault bien xxx sols un de vache xx sols.
at left bottom margin
dune peau de
mouton v ou vi