095r - - - - - [continued]
Le fourbisseur achepte ses lames a douzaine qui ne sont pas
achevees destre tirees par la queue pourcequil faict cela luy mesme
pour les bien adjouster au l pommeau & gardes
Les espaignolles sont estimees meilleures pour estre de meillleur acier
& fer Mays elles ne sont pas si bien forgees que les espees de vienne
en pro daulphine Les espaignolles ne sont pas aussy bien esmoulues
venant de la forge pour ce quils les esmoulent avecq le pied & cest
ce qui les faict trouver ondees
Les lames de vienne costent communement xviii ou 19 lb la douzaine
La premiere chose que faict le forbisseur ayant ses lames neufves
cest de luy estirer la queue ce quil faict ou faict faire aulx
serruriers ou mareschaulx luy donnant quelque liart pour son
charbon Apres ilz la passent par la meule pour la faire
trancher Puys lestendent sur le chameau Et avecq de lesmeril pulverise
subtil & doulx comme farine & destrempe dhuile pour le faire tenir
ilz fourbissent lespee avecq le baston pour oster les traicts de
la meule et puys le nettoyent pobien lespee de lesmeril Et luy donnent
une goute ou deulx dhuile quilz estandent avecq le doigt pour luy
donner lustre Et ayant mis lhuile Ils fourbissent encores lespee
sur le chameau avecq le felin qui est une pierre de fouldre
manchee au milieu dun baston comme la fustee Et ce baston
sappelle le baston a felinder Apres layant passe par le felin
ilz la fourbissent avecq de la croye & lhuile qui est dessus lespee
Apres lessuyent & la repassent & fourbissent avecq de la croye
seiche Et a la fin quand elles sont achevees de monter on leur
donne le fil avec le gratteau Ai
Estant fourbye on la monte sur les gardes lesquelles on presente
pour scavoir si elles conviendront bien Et empoignant une lame
de sorte que tout le talon soict compris dans la main on conjecture
quelle sera aussy poisante estant montee
On mect la lame dans un estoc entre deulx morceaulx de boys
puys avecq une lime ilz agrandissent si besoing est lentree de la
garde Puys pour la river, on pose sur la ribeure un lopin de
& pommeau un lopin de bois & avecq un marteau on frappe dessus
pour faire bien aplomber & asseurer le pommeau Puys avecq le
marteau on acheve la ribeure quand le marteau est bien asseure &
ne bransle point Le bois si mect pour ne gaster point le pommeau
Apres on acommode la ribeure avecq la lime ou avec un ciseau
Et aulcuns font le b la ribeure en table de diamant quarre mays
elle nest pas si bonne que la ronde car a la quarre la ribeure se
couppe
[continued]