094r - - - - - Fourbisseur
Les parties d’une espée sont la ribeure, la queue de l’espée, ce qui vient
aprés est le talon, le reste est le bame. Les costés sont le tranchant
& la poincte. Aulcunes lames sont à vive areste, qui ont une seule
coste eslevée au milieu & tout du long, et sont aisées à rompre.
Les aultres lames s’apellent à trois mouleures ou trois
monteures, qui ont bien une elevation au milieu mays elle est
platte comme si c’estoit une vive areste aplatie, et s ceulx cy sont
les plus asseurées. Les autres sont s’apellent canellees, qui
par le milieu sont encochées, & quand c’est tout du long, elles sont
aussy aisées à rompre que les vive areste & sont plus malaisées
à fourbir à cause que la fustée n’y peult pas entrer. Mays on
en faict une exprés, qui est estroicte.
De la garde de l’espée, est le pommeau, les branches de la garde
& le pontet, qui est ceste lame de fer qui ferme la branche qui
est au bout du talon pour empescher que les estocades ne glissent
dans la garde. Les aneaulx sont ces deulx branches en demy rond
qui prenent despuys l’oeil de la garde jusques à la branche du pontet.
La branche qui croise la garde s’appelle le corps, Et cest escusson
par où entre la queue de l’espée et auquel se rendent & tiennent toutes
les branches s’apelle l’oeil de la garde.
Il s’ensuict le bois de la poignée, lequel on colle, ou selon les
plus propres, de la cire gommée, qui est cire & poix, pource que la
rousine seroit trop dure. Il la chaufent legerement, puys en frottent
le bois de la poignée affin que la soye s’i grippe, ou le fil, aultrement,
quand un fil se defferoit, tout se d romproit incontinent. Au fil de
fer ou peau de chien, on y mect aussy de la colle. La garniture
de qui se mect sur le bois de, qui est de soye ou de filet, s’apelle
le cordon, qui se faict à deulx tro ou trois filets tournes retors au
rouet, ou 4 si la soye est deliée. Le cordon un peu grosset tient
mieulx. L’arrest, qui se faict aussy de soye, aulx deulx bouts de la
poignée s’appellent les boutons.
Il se faict des poignées de soye, de peau de chien de mer, de fil de fer
recuit, de fil d’or & d’argent fin & faulx & de velours. Le fil de
fer est de moindre prix & le plus durable. Aprés est celle de soye,
si on n’est en commodité prés de la mer pour recouvrer de la peau de
chien, qui est bien comode. Por La belle peau coste cinquante ou lx sous.
& s’en faict 4 ou cinq douzaines de poignées. Ceste cy donne bonne
prise encores que la main sue. Pour la mectre en besoigne, si elle
est trop dure, on la faict tremper une heure ou deux en eau fort
peu tiede, car si elle estoit trop chaulde, elle cuiroit & gasteroit la
peau. Elle se coust avecq fil noir.
Figure at left middle margin
[continued]