094r - - - - - Fourbisseur
Les parties dune espee sont la ribleure la queue de lespee ce qui vient
apres est le talon le reste est le bame les costes sont le tranchant
& la poincte Aulcunes lames sont a vive areste qui ont une seule
coste eslevee au milieu & tout du long Et sont aisees a rompre
Les aultres lames sapellent a trois mouleures ou trois
monteures qui ont bien une elevation au milieu mays elle est
platte comme si cestoit une vive areste aplatie Et s ceulx cy sont
les plus asseurees Les autres sont sapellent canellees qui
par le milieu sont encochees & quand cest tout du long elles sont
aussy aisees a rompre que les vive areste & sont plus malaisees
a fourbir a cause que la fustee ny peult pas entrer Mays on
en faict une expres qui est estroicte
De la garde de lespee est le pommeau les branches de la garde
& le pontet qui est ceste lame de fer qui ferme la branche qui
est au bout du talon pour empescher que les estocades ne glissent
dans la garde Les aneaulx sont ces deulx branches en demy rond
qui prenent despuys loeil de la garde jusques a la branche du pontet
La branche qui croise la garde sappelle le corps Et cest escusson
par ou entre la queue de lespee et auquel se rendent & tiennent toutes
les branches sapelle loeil de la garde
Il sensuict le bois de la poignee lequel on colle ou selon les
plus propres de la cire gommee qui est cire & poix pourceque la
rousine seroit trop dure Il la chaufent legerement puys en frottent
le bois de la poignee affin que la soye si grippe ou le fil aultrement
quand un fil se defferoit tout se d romproit incontinent Au fil de
fer ou peau de chien on y mect aussy de la colle La garniture
de qui se mect sur le bois de qui est de soye ou de filet sapelle
le cordon qui se faict a deulx tro ou trois filets tournes retors au
rouet ou 4 si la soye est deliee Le cordon un peu grosset tient
mieulx Larrest qui se faict aussy de soye aulx deulx bouts de la
poignee sappellent les boutons
Il se faict des poignees de soye de peau de chien de mer de fil de fer
recuit de fil dor & dargent fin & faulx & de velours Le fil de
fer est de moindre prix & le plus durable Apres est celle de soye
si on nest en commodite pres de la mer pour recouvrer de la peau de
chien qui est bien comode Por La belle peau coste cinquante ou lx sous
& sen faict 4 ou cinq douzaines de poignees Ceste cy donne bonne
prise encores que la main sue Pour la mectre en besoigne si elle
est trop dure On la faict tremper une heure ou deux en eau fort
peu tiede Car si elle estoit trop chaulde elle cuiroit & gasteroit la
peau Elle se coust avecq fil noir
Figure at left middle margin
[continued]