093v - - - - - Visaige à destrempe
Pource que les couleurs à destrempe sont promptement seiches
& qu’on n’auroict pas loisir de parachever les ombres &
touches qui sont au visaige, on mouille le derriere du
visaige qui est sur toile avecq une esponge mouillée. Puys,
avecq un petit pinceau, on faict les ombres, qui ne se deffont
point. Aprés on pose la carnation, qui n’empesche point que les
ombres desja faicts ne paroissent. Et encores d’une carnation
plus vive on touche les endroits plus relevés. Et avecq une
aultre pinceau, en hachant, on refaict les ombres. Les trais
d’ombre ne se deffont point pource qu’ilz sont de bistre, qui tasche
la toile comme la rouille. Ledict bistre est bon avec pour faire les
ombres à destrempe mesle, car à huile il n’a point de corps & ne seicheroit
qu’à grand peyne. On mesle parmy lesdict bistre, pour umbre, de l’ocre
de ru & un un peu de vert de vessie. Le meilleur bistre est
celuy gras & luisant des cheminées des grandes cuisines. Il est
difficille à broyer & crie sur le mabre.
Azur
L’azur d’esmail veult estre tousjours lavé pource que les
ordures qui se cognoissent dans les laveures le font mourir.
Il le fault coucher toujours deulx foys, & la premiere
fort espés, menant le pinceau en le couchant premierement de long
puys de travers. Il s’employe mieulx sur la toile,
où il s’emboit incontinent, que sur le boys. Le vernis le
remect en sa vigueur, pource que s’embevant il vient obscur.
Pour l’essayer, les painctres portent leur palette ches
les grossiers, & le destrempent & alient avecq un peu de blanc
broyé à huile, car en ceste sorte, le beau monstre sa vivacité
turquine, mays le mauvays est gris lavande. Le plus
delié est le meilleur pour travailler. Il se subtilie en
travaillant le lavant.
Violet et laque
Il se faict d’azur & de laque, laquelle s’esprouve aussy
sur la pallete avecq le blanc. Celle est estimée belle qui, sur
un costeau poly ou sur un verre, udonne une couleur claire
de rouge rose rouge tirant un peu sur le violet. Celle qui est
d’un noi rouge obscur n’est pas si agreable.