093v - - - - - Visaige a destrempe
Pource que les couleurs a destrempe sont promptement seiches
& quon nauroict pas loisir de parachever les ombres &
touches qui sont au visaige On mouille le derriere du
visaige qui est sur toile avecq une esponge mouillee Puys
avecq un petit pinceau on faict les ombres qui ne se deffont
point Apres on pose la carnation qui nempesche point que les
ombres desja faicts ne paroissent Et encores dune carnation
plus vive on touche les endroits plus releves Et avecq une
aultre pinceau en hachant on refaict les ombres. Les trais
dombre ne se deffont point pource quilz sont de bistre qui tasche
la toile comme la rouille Ledict bistre est bon avec pour faire les
ombres a destrempe mesle car a huile il na point de corps & ne seicheroit
qua grand peyne On mesle parmy lesdict bistre pour umbre de locre
de ru & un un peu de vert de vessie Le meilleur bistre est
celuy gras & luisant des cheminees des grandes cuisines Il est
difficille a broyer & crie sur le mabre
Azur
Lazur desmail veult estre tousjours lave pourceque les
ordures qui se cognoissent dans les laveures le font mourir
Il le fault coucher toujours deulx foys & la premiere
fort espes menant le pinceau en le couchant premierement de long
puys de travers Il semploye mieulx sur la toile
ou il semboit incontinent que sur le boys Le vernis le
remect en sa vigueur pourceque sembevant il vient obscur
Pour lessayer les painctres portent leur palette ches
les grossiers & le destrempent & alient avecq un peu de blanc
broye a huile Car en ceste sorte le beau monstre sa vivacite
turquine Mays le mauvays est gris lavande Le plus
delie est le meilleur pour travailler Il se subtilie en
travaillant le lavant
Violet et laque
Il se faict dazur & de laque laquelle sesprouve aussy
sur la pallete avecq le blanc Celle est estimee belle qui sur
un costeau poly ou sur un verre udonne une couleur claire
de rouge rose rouge tirant un peu sur le violet Celle qui est
dun noi rouge obscur nest pas si agreable