092v - - - - - Sable des telines et moules de riviere
Les coquilles longues qui se trouvent aulx rivieres d’eau
doulce, estant calcinées, font un sable blanc impalpable qui
moule fort net.
Congellation de mercure
Il se congelle, comme j’ay essayé le faisant bouillir une
heure ou deulx dans une assés grande cassolle de fer, y mectant
pour ℥ de ☿, ii ℥ de verdet de et de vitriol de salpestre
ana, avecq suffisante quantité d’eau vielle des mareschaulx.
Ou bien fondre 4 ℥ d’estaim &, comme il se froidist, le
purifier de sa crasse qui est dessus, puys y faire un trou
& là dedans mectre i ℥ de ☿ & il viendra comme estaim si tu
le refonds, mays il sera frangible. Et si tu veulx esprouver
si c’est estaim ou ☿, fais rougir une palle & mects un petit
lopin de ton lingot dessus. Si c’est estaim, il se fondra & demeurera,
mays si c’est ☿, il sera incontinent fondu, puys en petillant bien
fort, s’envolera. Il le fault congeller dans une cuellere
ou creuset creux & faire le trou mediocre.
Il se congelle aussy, comme j’ay esprouvé, dans de l’eau fort
qui aura mangé un peu d’argent plustost.
Cestuy cy meslé faict courre l’estain & plomb.
Mixture
Estaim fin, mercure congellé à l’odeur de l’estaim, estaim de glace,
plomb fin, aultant d’un que d’aultre, faict une matiere fort
promptement fondue mays frangible & blanche. Je pense qu’elle
seroit bonne pour souldeure. Longue à se froidir.