092v - - - - - Sable des telines et moules de riviere
Les coquilles longues qui se trouvent aulx rivieres deau
doulce estant calcinees font un sable blanc impalpable qui
moule fort net
Congellation de mercure
Il se congelle comme jay essaye le faisant bouillir une
heure ou deulx dans une asses grande cassolle de fer y mectant
pour ℥ de ☿ ii ℥ de verdet de Et de vitriol de salpestre
ana Avecq suffisante quantite deau vielle des mareschaulx
Ou bien fondre 4 ℥ destaim & comme il se froidist le
purifier de sa crasse qui est dessus puys y faire un trou
& la dedans mectre i ℥ de ☿ & il viendra comme estaim si tu
le refonds Mays il sera frangible Et si tu veulx esprouver
si cest estaim ou ☿ fais rougir une palle & mects un petit
lopin de ton lingot dessus Si cest estaim il se fondra & demeurera
Mays si cest ☿ il sera incontinent fondu puys en petillant bien
fort senvolera Il le fault congeller dans une cuellere
ou creuset creux & faire le trou mediocre
Il se congelle aussy comme jay esprouve dans de leau fort
qui aura mange un peu dargent plustost
Cestuy cy mesle faict courre lestain & plomb.
Mixture
Estaim fin mercure congelle a lodeur de lestaim estaim de glace
plomb fin aultant dun que daultre faict une matiere fort
promptement fondue Mays frangible & blanche Je pense quelle
seroit bonne pour souldeure Longue a se froidir