092r - - - - - Sable Mixture aysée à fondre
Une ℥ de partye d’estaim doux, une partye de plomb fin, une
partye d’estaim de glace & une partie d’argent vif arresté faict une
ligue & souldure si aisée à fondre qu’aisement elle se peult fondre
dans un plat d’estaim fin.
Mouler cave d’un costé et de relief
de l’aultre
Et pour cet effect on gecte une medaille d’estain fin, qui est plus
dur à fondre. Et comme elle est nette, on moule avecq icelle. Et on
la laisse en l’une moictié du chassis, & on l’y presse un peu affin
qu’elle y tienne mieulx. Et aprés tu gecteras dans ton chassis
de la souldure cy dessus descripte, ou aultre plus fondante
que l’estain fin. Et ainsy la seconde medaille se fondra &
moulera sur la premiere sans la gaster. Mays pour faire
plus seurement, destrempe du noir de lampe avecq de l’eau, & avecq
un pinceau donnes en une couche legere sur la medaille qui
demeure dans le chassis & laisse seicher. Ainsy elle ne fondra
poinct.
Mays si tu as une medaille de cuivre ou d’argent, tu la peulx
bien laisser dans le gect si tu veulx gecter de plomb ou estaim.
Mays il fault qu’elle soict un peu chaulde, car la froideur feroit
retirer l’estain.
L’estaim veult estre gecté bien chault pour venir net.
L’estain doulx qui est le meilleur pour le gect est celuy qui, estant
gecté en grille, est bruny & luisant & poly comme un mirouer & qui semble
avoyr esté bruny. Et n’ha poinct de trous comme celuy qui est aigre & qui
n’est point luisant comme bruny.
Potin
Le potin, estant gecté chault, court & coule comme estaim. Mays la
medaille en est blanchastre et jecte incontinent le verd, ce que ne faict
la bonne matiere.
Mouler statues
La moictié de terre bourre dont usent les fondeurs & moictié
terre ardille g rend fort net.