092r - - - - - Sable Mixture aysee a fondre
Une ℥ de partye destaim doux une partye de plomb fin une
partye destaim de glace & une partie dargent vif arreste faict une
ligue & souldure si aisee a fondre quaisement elle se peult fondre
dans un plat destaim fin
Mouler cave dun coste et de relief
de laultre
Et pour cet effect on gecte une medaille destain fin qui est plus
dur a fondre Et comme elle est nette on moule avecq icelle Et on
la laisse en lune moictie du chassis & on ly presse un peu affin
quelle y tienne mieulx Et apres tu gecteras dans ton chassis
de la souldure cy dessus descripte ou aultre plus fondante
que lestain fin Et ainsy la seconde medaille se fondra &
moulera sur la premiere sans la gaster Mays pour faire
plus seurement destrempe du noir de lampe avecq de leau & avecq
un pinceau donnes en une couche legere sur la medaille qui
demeure dans le chassis & laisse seicher Ainsy elle ne fondra
poinct
Mays si tu as une medaille de cuivre ou dargent tu la peulx
bien laisser dans le gect si tu veulx gecter de plomb ou estaim
mays il fault quelle soict un peu chaulde car la froideur feroit
retirer lestain
Lestaim veult estre gecte bien chault pour venir net
Lestain doulx qui est le meilleur pour le gect est celuy qui estant
gecte en grille est bruny & luisant & poly comme un mirouer & qui semble
avoyr este bruny Et nha poinct de trous comme celuy qui est aigre & qui
nest point luisant comme bruny
Potin
Le potin estant gecte chault court & coule comme estaim Mays la
medaille en est blanchastre et jecte incontinent le verd Ce que ne faict
la bonne matiere
Mouler statues
La moictie de terre bourre dont usent les fondeurs & moictie
terre ardille g rend fort net