091v - - - - - [continued]
comme les deulx os sont joincts co couppe les tout aultour bien uniment
& fais des coches e aultour en divers endroicts qui traversent
sur la joincture des deulx os affin de recognoistre bien lendroit
de leur premiere joincture Ou bien avecq de petites pointes de
bois traverse les ou ma enduicts les joinctures avecq de lardille
& fais seicher Presse entre les des mains joinctes entre
les deulx genoux & non pas avecq presse pourceque los
sesclateroit Moule aussy a laise & a deulx ou trois fois
jusques a ce que tu voyes quil soict bien acache & bien
empraint et a chasque fois plustost que remectre la piece
ponce avecq du charbon de saule Car il faict bien despouiller
Quand tu as gecte frotte dhuile & de pouldre de charbon
de saule & avecq des broisses la medaille pour la
ternir Garde que ta medaille ne soit point grasse ne
huilee quand tu mouleras en os de seiche Quand tu as
gecte laisse refroidir plustost den retirer la medaille
car quand on la retire chaulde elle emporte de los Et
gecte mediocrement chault ce que tu cognoistras quand
los ne change presque bien point sa blancheur Mays
quand il est trop chault il roussist fort los La
proportion de plomb & estaim est dun aultant que daultre
Si la piece est difficile a venir & de plusieurs pieces
fais le gect fourcheu de trois ou quatre rayes et
fais & conduicts ces rayeures a lendroit des parties
plus espesses Fais aussy des rays aultour de la
medaille comme au droit des testes car cela attire le
metal & abreuve mieulx la figure Remue un peu ton
chassis quand tu as gecte Et ainsy tu feras fort net
plusieurs gects Lestain trop chault brusle los qui
se corrompt Estant aussy retire du mo chault du moule
il est dangereulx a rompre
Figure
