091r - - - - - Hanter
De tout abre qui ha plus grosse moelle, le greffe est malaisé à estre bien tailler,
pource qu’il y a dangier d’offenser la moelle, & si elle est offensée
à droict la joincture, malaisement prend il, comme de la vigne, de touts persées
& des abricots.
Les abricots ont l’escorce fort deliée, & par ainsy il les fault
enter sur jeunes abres qui ne l’ayent poinct encores espesse, comme sur
gectes de prunier & amendiers.
Les greffes ne prenent gueres si la taille de l’abre se mouille.
Il fault doncq hanter en temps serain & doulx, & non trop froid &
venteulx.
Le bois vieulx qu’on laisse au greffe est necessaire si on ente sur
un abre qui est desja faict & de bonne grosseur, pource que estant tel
il serre plus le greffe, & s’il est de jeune bois il est si comprimé qu’il
ne peult profficter. Mays le bois vieulx resiste mieulx à la
compression du bois vieulx que le jeune à cause qu’il est plus dur que
le jeune. Mays si le greffe est tout de bois vieulx, jamays il ne faict
belle mise, ains vient caduc & court & long à croistre.
Mouler en os de seiche
Garde bien de ne les tenir en lieu humide, car ilz sont
fort subgects à s’humecter. Si ta medaille est petite, couppe l’os
en deulx puys unis le avec un costeau. Et sur une tuile à crochet
bien seiche & bien unie & couverte de charbon de saule pulverisé,
frotte & unis les moictiés des os. Ainsy ilz s’abreuvent de ce
charbon de saule, qui les faict bien despouiller & garde de rien
enlever. Puys sur un contre os, c’est à dire un lopin de
brique unye de la grandeur de ton os, pose ta medaille, & puys
sur icelle pose l’os, & presse bien avecq quelque aultre piece de
la grandeur par dessus. Et pour la seconde fois moule le,
mays plustost ponce dessus du charbon de saule & soufle
legerement, puys presse comme auparavant, et il viendra net.
Si c’est pour un manche de cuiller, il fault deulx os entiers.
Tout ouvrage gecté est aigre & subgect à rompre, pource que
le metal se dilate au gect & se reserre & condense au marteau.
C’est pourquoy il fault resuivre la chose gectée avec le ciselet,
& en ceste sorte le metal se resserre. Laisse le ainsy escrouir.
Si la piece à mouler est de grand relief, trasse premierement le
moule & le cave avecq un trancheplume pour faire voye à la
medaille, & puys moule. Et si la medaille est à deulx envers,
at left bottom margin
Plustost que
geter, chaufe
les os affin de
leur faire
perdre seulement
la froideur
& humeur.
at left bottom margin
Quand le
plomb chaufe
trop, il se
calcine.
[continued]