090v - - - - - [continued]
bon & propre a mouler Car sil est gros passe le par un tamis
et sil nest encores asses subtil Lave le & comme leau sera un peu
reposee Vuyde celle qui est encores trouble en quelque vaisseau
a part Le grossier sen yra promptement au fonds du premier
vaisseau Mays celuy qui sera provenu de leau trouble mise
a part ayant faict residence se trouvera fort subtil Et
lors sil na asses liaison broye le bien sec sur le porphire
& tu le rendras impalpable & qui aura liaison comme de la
croye Puys sil te semble tu le recuiras & de rechef le
broyeras & mesleras avecq des sels ou linge ou foeultre brusle
ou cendres de papier & choses semblables lavees
Terre fondue des potiers
Broye le dans un mortier moulin de moustarde avecq de leau & le
rends impalpable desseiche le & apres lhumecte avecq
eau sel qui donne force au touts sables pour soubstenir
plusieurs gects
Orangers
En Italie ceulx qui sont aulx pays plus froids comme la
lombardie font des caisses quarrees de bois un peu plus
larges au fonds quau hault Et y apliquent des boucles
aulx costes pour les transporter avecq des leniers ainsy
quon porte les gouteus A cause que les roues avecq lesquelles
on les pourroit faire rouler gastent les allees des jardins
Et de deulx ans en deulx ans ilz noublient pas douvrir les
costes des caisses pour roigner & couper dextrement avecq la terre
Les extremites des racines des orangers pourceque aultrement
comme elles trouvent le boys elles se reserrent & replient en elles
mesmes & se deseichent par les bouts & feroient mourir labre
Mays comme elles sont roignees il leur demeure espace nouveau
cos pour sestandre sans trouver la resistance du boys qui les
gehenne Et croy que pour cet effect il seroit bon de joindre
les costes des caisses avecq des vis & non avecq clous affin
de nesbranler point la terre quand on les ouvre