089v - - - - - Sel armoniac et albastre
Le sel armoniac bien pulverisé mou & broyé à sec sur le mabre
moule fort net & est de tres belle despouille, & estant meslé avecq
l’albastre pulverisé de mesme, ii ℥ pour lb dalbastre, il le faict
bien despouiller. Il suffist de l’humecter dans une cave ou au serain
ou, pour avoyr plustost faict, dans une feille de papier entre une
serviette mouillée. Mays advise qu’il n’y demeure pas trop, car il
viendroit si destrempé qu’il ne seroit pas bon à mouler en chassis,
ains en noyau, en quoy tu le pourras bien employer, pourveu qu’il
seiche fort à laise & loing du foeu. Aultrement la chaleur le faict
gonfler & gecter le sel à la superficie, qui le rend grumeleux.
Tu peulx en oindre d’huile daspic la medaille, moulant en noyau.
Il est mieulx d’y mectre 4 ℥ de sel armoniac pour lb et l’humecter
en lieu humide deulx ou trois jours, & de telle sorte que, quand tu le prens
a poignées, il se tient, sans toutesfois s’attaquer & empaster la main. Tu en
mouleras fort net. Mays laisse seicher & recuire bien fort, laissant
le moule dedans affin quil adquiere force en recuisant, car il vient dur
comme pierre, & en ceste sorte est plus seur a bien despouiller. Aultrement, si tu
despouilles sans avoir plustost recuit, il y auroit danger qu’il s’esmiast en quelque
endroit à cause de sa delicatesse & subtilité,
mesmement si la medaille est de grand
relief. En ayant moulé, pulverise
le comme devant et remects à l’humide.
at left top margin
Tout sable qui
despouille bien ha corps
& faict bonne prise.
L’armoniac est gras
et a va toutesfois est
areneulx, qui faict bien
despouiller. Il n’y ha
point meilleure liaison
que des sels propres
aulx metaulx, car
estant meslés en
pouldre, ilz s’humectent
ensemble & se deseichent
& recuisent ensemble.
Sable de mine blanc des verriers
meslé de sel armoniac
Il se trouve en Cominge, pres de la ville d’Aurignac, un sable blanc
mai comme du sel et maigre, dont les verriers & potiers se servent,
qui se rend impalpable broyé sur le porphire & est aisé à broyer.
Et l’estant, il semble albastre calciné. Il moule tres net, et
n’en ay point trouvé qui moule plus delicat que cestuy là en bas
relief. Il est excellent à mouler en noyau sans chassis, l’ayant broyé
impalpable avecq de l’eau gommee ou pure sur le porphire, puys le
posant espés comme moustarde ou un peu plus sur la medaille legerement
oincte d’huile, ou d’olive, noix ou pour mieulx d’aspic. Mays pour
mieulx faire mo, laisse seicher de soy mesme, sans foeu, un jour ou
deulx. Combien que, si tu as haste, tu le peulx bien chaufer, & il ne
se fendra point s’il n’est posé trop cler. Il est vray qu’estant ainsy
surpris du chault à coup, il faict quelques trous & pustules,
ce qu’il ne faict pas estant seiché à froit ou à l’ayse plustost
qu’estre recuit. Estant sec, recuits le & il soubstiendra plusieurs
gects.