089r - - - - - Sable d’os de bœuf bruslé
et sal gemme
Je les ay pulverisés separement & subtiliés sur le porphire, le plus
que j’ay peu. Puys j’ay meslé aultant d’un que d’aultre & repassé
sur le porphire. Je l’ay aprés humecté dans un papier replié dans
une serviette mouillée, qui est plus tost faict qu’au serain de la nuit
ou à l’humeur de la cave. Et n’en ay point trouvé qui despouille plus
net que cestuy cy. Il veult estre asses humide. Et si tu le veulx gecter
fort tanvre, fais qu’il soict plus chault. Il est venu en estain doulx fort net
comme le principal, et ha soubstenu plusieurs gects. Pour l’estaim, je
croy qu’il n’en fault point chercher de meilleur, ne pour le plomb fin
aussy, qui vient quasi plus net que l’estaim. Tou L’os de pied de
bœuf est tousjours si aride tout seul que, sans estre meslé
d’une part ou deulx de quelque sable gras & ayant liaison comme
le tripoly, les sels, le foeultre, les cendres & choses semblables,
il ne despouilleroit pas, & ne mouleroit pas net aussy car il s’esmie.
Recuire ou essuyer
un chassis moulé
Mecte tousjours la plus delicate partye, comme du visaige, en sus
affin qu’il ny tumbe rien qui puisse empescher ta fusion.
Sable naturel
Il ne veult pas estre recuict pour le plomb et estaim,
m et est meilleur tout neuf & frais.