088r - - - - - Visme
Il se peult planter, comme la ronce, des deulx costés, & ceulx qui
plantent le gros pied contre mont disent qu’il faict plus grosse
souche. Mays, il n’y ha que la poincte en hault, car il croist
plus hault.
Mortiers
Les mortiers de cuivre fin ne jectent point de foeu, pourveu que
le pilon de fer ne soict point trempé. Si faict bien le mortier de
metal, pource qu’il est aigre. On faict pour ceste occasion le
fons des grands mortiers de cuivre fin.
Vernis
Huile de tormentine, tormentine & bonne eau de vye pour le
rendre desiccatif. Fais chaufer sans mesler sur le rechault,
affin qu’il se mesle pu de soy mesme en fondant. Aprés esprouve
sur un costeau bien net, & tu cognoistras là s’il ha assés de corps
& s’il ne coule point trop.
Hanter
On trouve par experience que le greffe qui est ha son entrée
dans l’insition du costé du soleil prend bien peu souvent, quand il
est aussy tortu.
Boulangier
La poulsiere garde le bled de cussonner. Et pour le bien
nettoyer quand il est taché & comme rouillé, passe des cendres
par le tamis & les mesle avecq le bled, puys bellute
le tout avecq un belluteau de grosse toile ou canevas.
Les cendres passeront & ton bled demeurera jaulne, net & fort
beau.
Estain de glace
Il faict la matiere plus blanche.