087r - - - - - [continued]
Pour bien mouler il fault gecter dans un grand chassis
plusieurs medailles ensemble Car quand il y a beaucoup de
matiere & que le crusol est presque plein il chaufe dadvantage
& puys si une medaille ne vient bien laultre sera bonne
Il vault mieulx fondre au fourneau a souflets quau four
a vent pource que il donne la chaleur plus roide Il est
vray que le letton font bien au four a vent pource que il est
plus aise a fondre que le cuivre comme estant plus aigre
Les fondeurs ont quelques uns ceste superstition quil ny a
que trois jours en la sepmaine bons a fondre scavoir le mardy
le mercredy jeudy et le sabmedy les aultres leur sont
malheureulx
Quand tu moules ne frappe pas excessivement sur la medaille
qui est en sable pource que cela lempesche de despouiller
bien net & estonne le moule
Advise aussy que le sable ne surpasse point les bords du
chassis car cela faict la medaille moulee plus haulte que
le gect & jamays en ceste sorte le metail nentrera bien dans
la forme Fais doncq tousjours que la superficie de ton
gect surpasse a ligne droicte le moule Et pour cest effect
mects y si bon te semble un lopin de carton de telle espesseur
quil te plaira
Les fondeurs pour garder de soufler leur ouvrages de
grand gect il sont curieulx de tresbien recuire leurs moules Et
pour cognoistre sils sont asses recuits ilz frappent du doigt
contre & sils commancent a sonner comme un pot Ils le sont asses
Pour gecter net leurs canons ilz meslent parmy
leur terre de fin sable de gect sils en peuvent recouvrer
Sable de Thoulouse
Le bo communement bon est celuy qui se trouve en une vigne de puy
david> Mays celuy qui est le plus excellent est celuy du touch pres
de Sainct Michel & vers blagnac En une vigne qui est bien haulte
Cestuy est plus delie & un peu plus gras que laultre & meilleur pour
petits ouvrages Il ne veult pas estre trop recuit