086v - - - - - [continued]
soufle. Surtout fais que le gect soict tousjours plus hault
que la chose moulée, pource que bien souvent le sable, en recuisant
, s’enfle & si le par ce mesmement sur le milieu, & par ainsy la
chose moulée demeurant plus haulte que le gect, le metal
n’y peult courre à l’aise ou du tout n’y entre poinct. Fais
aussy que le moule & le gect soient bien recuits. Gecte
aussy à coup & hors du vent. Et si ta medaille est fort
tanvre, mects une carte ou deulx ou trois espesseurs de papier
dessoubs quand tu la vouldras mouler. En ceste sorte, le
moule sera plus bas que le gect. Gecte aussy par l’endroit
que ta medaille sera plus es moins espesse & où il y aura
moings de relief.
Sable excellent pour plomb,
estain, et cuivre
D
Despuys je moulay d’os bruslé, de mache de fer & feultre
bruslé fort pulverisés & subtiliés sur le mabre et bien
meslés ensemble. Je les humectay bien fort avecq glaire
d’oeuf battue. Et en ayant, comme des aultres, couvert la medaille,
puys remply le chassis de sable de mine, je frappay
mediocrement. Je le trouvay de fort bonne despouille & moulay
fort net. Je le laissay reposer toute une nuit. Le lendemain
matin, je le fis recuire peu à peu l’espace de sept ou huict
heures (car, s’il est possible, il ne fault qu’il reste
aulcune humidité au chassis). Je y gectay deulx foys
cuivre allié de ☾ comme vieulx K. La matiere vint fort
belle, lustre, & sonante, & sans chappe, et mon sable ne se
corrompist aulcunement. Despuys je y gectay plusieurs
gects de plomb doux & d’estain qui vindrent le mieulx &
plus nects que nul aultre que n’eusse trouvé encores.
Quand tu moules, fais certains traicts aultour de ton
moule dans le chassis affin d’attirer la matiere de tous costés,
en ceste sorte.
Figure
Le potin de seringue & aultres co ouvrages court mieulx
encores que le fin laitton. Mays je croy qu’il est mieulx moictié
cuivre & moictie letton qui ont servi & ont esté en ouvrage fort
tanvre comme de poelonne & semblables. J’ay veu bien venir ceste
mixture de moictié.
[continued]