081v - - - - - Sable
La seule brique fort subtillement passée & usée l’une contre
l’aultre, est bonne à touts gects de plomb et de cuivre,
destrempée avecq urine. Il fault que ce soit de ceste
brique blanchastre.
Fayre courre le cuivre et letton
Mects sur la fin, comme il est bien chault et comme tu veulx
gecter, du sel armoniac & salpestre, cela oste la crasse
& l’eschaufe. Mesle des ardides parmy le letton. @Garde que
le metal ne touche point le fer ou letton du chassis, mays enduits le
de sable ou luth. Fays le gect fort uny.
Sable
Les caillous noirs de riviere calcinés sont bons pour le
plomb, mays ilz s’estonnent pour le metal.
Il n’y a que la terre ardille de quoy on faict les tuiles,
recuite & rougie & passée par une manche subtillement destrempée
avecq glaire.
Le charbon de saule pour sable pour le b plomb @est excellent.
Le laitton court mieulx.
Gect de chassis
Il est bon de le faire avecq du bois de buy. Tourne affin qu’il se
fasse uny, car cela importe pour le gect. Lute aussy ou couvre de
sable la bouche du chassis affin que le metal fondu ou plomb ou
cuivre ne touche point le fer ou letton du chassis, car cela l’aigrist
& le faict soufler. Fais aussy que le gect soit tousjours plus hault
que le moule. Garde aussi que le gect ne soit point trop large ne
profond, car le plus estroit est le meilleur. Car quand il est grand,
la pesanteur de la matiere qui court romp & estonne le moule &
faict soufler. Quand tu as gecté, frappe doulcement le chassis
affin que la matiere s’espande mieulx. Le plomb noir de saulmon
de la premiere fonte faict fort net.