077r - - - - - Contre les rougeurs du visage
Fais une petite coiffe de plomb & la porte la nuit. Excellent
secret. Essaye un masque de plomb.
Medecine des Orientaulx contre
toutes maladies
Figure
Fais secher du rosmarin au moys de may. Puys emplis ce godet
de pouldre diceluy, et mects un charbon allumé dessus. Et
reçois la fumée par la bouche bien serrée, et une partye
te sortira par le nes. Mays si tu veulx purger la teste, sarre
aussy le nes contre morfondiments, rheumes, & aultres malladies.
Terre graisse
Les fondeurs, pour en faire les anses de leurs cloches, s’en servent.
Et plustost que s’en servir, ilz la battent bien fort, puys la laissent
secher à l’ombre peu à peu & à long temps, et en moulent fort net.
Mays il ne fault pas qu’elle soit areneuse &, ains bien choisie & doulce.
@ Recepte pour faire bronze et vernys de
plusieurs sortes
Pour faire vernys excellant d’eaue claire duquel uzeras aveq le
pinceau, et incontinant seiche, pour mectre sur pappier, tablette ou
aultre piece.
Premierement, tu prandras cinq onces d’eau de vye et une once
de betjoin, pillez entre deux pappiers ou cartes ou en ung mortier.
[continued]