076r - - - - - [continued]
s’y n’en trouves, et en couvrir d’icelle pouldre ledict boys,
jusques à ce qu’il soit froid, & le ferés rebouillir, & en boulhant
on verra s’il sera asses noir ou non. Et s’il n’est asses, vous
prandrés de ladicte pouldre & en mectés sur ledict boys en boulhant.
Pour faire boys verd
Fault prandre une carte de vinaigre blanc & une once
de verd & une once d’alun de glace, tout meslé ensemble, et
mecterés vos matieres en ung pot plombé dessus le foeu sans
prandre air, & puys mectre le pot en ung fumier l’espace de
quinze jours, et quand il sera hors, vous ferés bouillir vos
matieres l’espace de trois heures.
Pour faire boys rouge
Prenés une carte d’urine vieilhe et trois onces de garance
& une once d’alung de glace, et mectrés le tout dans vostre pot,
& faictes comme du verd.
Pour le faire bleu
Prenés une carte d’urine comme dessus et une once d’alung
& deux dragmes de sel armoniac & demye once de fleurs de
pastel, le tout mis en pouldre, et en faire comme du verd.
Pour le faire violet
Prenés une carte d’hurine & une once d’alung & deux dragmes
de sel armoniac & une de lacque, & faire comme dessus.
Pour le faire jaulne
Prenés hurinne comme dessus et guesdre deux onces & une
once de fustet et deux ounces dragmes de sel armoniac, & faire
comme dessus.