074v - - - - - [continued]
foeu jusques à ce qu’il soit assés cuyt. Et la coullés par dedans
une toille qui soit asses serrée. Et quand vous l’aurés coullé,
laissés la refroidir ung petict. Et si vous voiés qu’il soit
trop espaix que vous ne le puissiés couler, vous mectrés ung
petict dudict huille & le ferés meilheur.
Pour faire vernys rouge
Prenés de vermilhon et le faictes tremper avecq de l’eaue
de gaulme bien clair, ainsin que l’aultre, faicte deux ou
trois assictes comme dessus.
Pour faire vernys jaulne
Prenés de la gaulme arrabic & la faictes trdestremper aveq
de l’eaue, puys prenés du saffran bien baptu, & destrempé
ladicte gaulme, et la faictes bien claire, puys faictes vostre assicte
sur ce que vous vouldrés vernir, & la laissés secher, & quand
il sera sec, donnés une aultre assicte du mesme, & la laissés
seicher comme devant tant qu’il sera assés sec. Puys prenés
du verny de l’apoticquaire. Concassé par cou assés loing l’ung
de l’aultre. Puys lavés vostre main bien necte & de la paulme
d’icelle estendés vostre verny.
Recepte pour gaulme blanche
Prenés sire blanche & de la seruze & ung petict de poix
fine tres bien pillée ensemble, & la mectés dedans ung petict
pot neuf & la faictes fondre. Et quand elle sera fondue, vous
ferés une palette de boys, de & brunisés ce que vouldrés.
Gome verte
Prenés de la cire verte aveq du vert de gris ung petict, et le
faictes fondre comme dessus.