072r - - - - - Lettres d’imprimeur
Ceulx qui les font meslent parmy le plomb des clous testes
de cloux & vieulx fers de cheval, & antimoine qui faict
fondre le tout. Ceste composition est ferme pour l’impression
& tient coup. Elle coule et est bonne pour gecter en plomb.
Gecter en cuivre
Il fault que le chassis soict bien uny & qu’il s’adjouxte
bien esgallement sur la planche où il est assis, affin qu’il tienne
ferme & ne varie point quand on moule. Il fault que le sable soict
propre & bien choisi, et bien recuit & pulverisé fort subtillement sur le mabre, pour celuy que tu veulx premierement mectre sur la
medaille, et qu’en moulant tu presses fort. Garde toy d’huiler
ta medaille car cela feroit soufler. Recuits lentement et recuits
bien, & laisse refroidir. Humecte ton sable avecq vin bouilly
avecq racine d’orme, et gecte letton qui vient bien / sçavoir de
la matiere de trebuschets et choses semblables tanvres. Fais
ton gect large, & encores qu’il ne soict gueres espés, il n’en sera
pas pire, mays qu’il entre bien dans le moule. Gecte par le
pied de la medaille affin que le visage, plus loing de la chaleur,
vienne mieulx & plus adoulcy de la violente chaleur. Et si ton
chassis n’ha poinct de souspirails, fais en qu dans le sable,
qui viennent des cantons de la piece se rendre dans le gect.
Gecte fort chault, ce que tu cognoistras quand tu gecteras un
peu de la matiere reservée dans celle qui desja est bien
fondue, & si elle se fond incontinent c’est signe qu’elle est fo bien
chaulde. Lors vigore la chaleur de ton fourneau avecq les
souflets de bonne grandeur, tenant la bouche du fourneau
bien couverte de quelque cuivr grosse tuile ou aultre chose
semblable, qui doibt estre bien rouge plus tost que tu gectes.
Quand tu vouldras gecter, ayes tes molletes bien rouges & le
fer crochu aussy, pour nettoyer les charbons qui sont dans ta
matiere. Ayant gecté, frotte avecq une grattebroisse de letton
ton ouvrage. La molée des gros ciseaulx & grands cousteaulx
est fort bonne pour le cuivre.
at left middle margin
On tient pour grand
secret d’y mectre de
la persicaire,
qui les rend doulx
comme plomb. Essaye
d’en tirer le sel.