071v - - - - - Vernis
Sur demy lb d’huile d’aspic, mects 4 ℥ de sandarach
& de mastich pulverisés subtillement. Et fais premierement bouillir
l’huile dans un pot sur un rachault, et puys mesles y petit à petit
les susdictes gommes, tousjours remuant avecq un petit baston
refendu et escartelé par le bout, & comme avecq ce bout, tu ne
rameneras point de gomme, c’est à dire qu’elle est toute fondue
& que ton vernis est faict. Et pour le rendre plus clair,
mects y à discoction un petit lopin de camphre. Il est vray
qu’avecq cela il n’est pas si tost sec. Advises bien que l’huile
d’aspic soict bon, clair & point gras, aultrement ton vernis ne
vauldroit rien. Tu le peulx prouver, d trempent dedans
du papier & le chaufer. Si l’huile qui s’evaporera laisse
ton papier nect, sans estre marque jaulnastre, il est bon,
sinon il est gras.
Graisse de mouton
En certaine contrée d’Angleterre, les moutons qui y
paissent ont la graisse fort jaulne et sont neantmoings
aussy bons que les aultres.
Araigné
En Hibernie il ne s’en trouve poinct, & si on les touche
d’un bois qu’il y a, elles meurent. C’est pourquoy aulcuns
riches d’Angleterre font leurs planchers de ce boys, &
par ce moyen ils n’ont jamays d’arantelles & toiles
d’iraignée.
Sable
La moulée est fort bonne pour gecter en cuivre, mays il ne
fault prendre de celle des cousteliers, car ce n’est que vase,
mays de celle que font ceulx qui moulent esmoulent les grands
ciseaulx.
Les pierres de filieres, de quoy adoulcissent ceulx qui aguisent,
moule fort net, estant raclée, pour le plomb. Elle est communement
de couleur d’ardoise. On en porte fort à Thoulouse de vers Carcassonne.