071v - - - - - Vernis
Sur demy lb dhuile daspic mects 4 ℥ de sandarach
& de mastich pulverises subtillement Et fais premierement bouillir
lhuile dans un pot sur un rachault et puys mesles y petit a petit
les susdictes gommes tousjours remuant avecq un petit baston
refendu et escartele par le bout & comme avecq ce bout tu ne
rameneras point de gomme cest a dire quelle est toute fondue
& que ton vernis est faict Et pour le rendre plus clair
mects y a discoction un petit lopin de camphre Il est vray
quavecq cela il nest pas si tost sec Advises bien que lhuile
daspic soict bon clair & point gras aultrement ton vernis ne
vauldroit rien Tu le peulx prouver d trempent dedans
du papier & le chaufer Si lhuile qui sevaporera laisse
ton papier nect sans estre marque jaulnastre il est bon
sinon il est gras
Graisse de mouton
En certaine contree dangleterre les moutons qui y
paissent ont la graisse fort jaulne Et sont neantmoings
aussy bons que les aultres
Araigne
En hibernie il ne sen trouve poinct & si on les touche
dun bois quil y a elles meurent Cest pourquoy aulcuns
riches dangleterre font leurs planchers de ce boys &
par ce moyen ils nont jamays darantelles & toiles
diraignee
Sable
La moulee est fort bonne pour gecter en cuivre mays il ne
fault prendre de celle des cousteliers car ce nest que vase
Mays de celle que font ceulx qui moulent esmoulent les grands
ciseaulx
Les pierres de filieres dequoy adoulcissent ceulx qui aguisent
moule fort net estant raclee pour le plomb Elle est communement
de couleur dardoise On en porte fort a Thoulouse devers Carcassonne