071r - - - - - Ambre
Il se ramollist comme paste estant bouilly en cire fondue,
et prend couleur bouilly avecq graise de jeune chevreau,
car celle du bouc le feroit rompre, principallement s’il est glacé.
Bois madre
L’orme, en sa racine noueuse, a de belles madreures diversifiées de
gris et de noir, et la racine d’herable, mays il fault bien choisir
le fil du bois. On donne à l’herable certaine couleur jaulne, puys
on le vernist.
Vin bruslé et sucré
Les Anglois, se sentant morfondus, font brusler du vin en ceste
sorte. Il le font chaufer dans un pot d’estain jusques
à ce qu’il bouille, et comme il leve un bouillon, ilz l’allument
avecq du papier enflammé pour sçavoir s’il est assés chault.
Aprés, pour l’enflammer du tout, ils le versent d’un vaisseau
dans un aultre comme qui vouldroit battre de l’eau panée. Et comme
ilz font cela, quelque aultre avecq un papier enflammé allume
ce qui tumbe d’un vaisseau à aultre, de sorte que tu dirois
que tu verses du foeu. Comme le vin est asses bruslé, fais le encores
un peu chaufer y adjoustant quelques cloux de girofle & suffisante
quantité de sucre. Et en boivent le plus chault qu’ilz peuvent
pour se gaigner un morfondiment.
at left middle margin
Les vulgaires
anglois mectent
du sucre dans le
vin pour se
representer le
vin douls nouveau,
qu’ilz ne peuvent
avoyr pourceque
par le long traict
de la mer le vin
a perdu sa
doulceur et est
clarifié plustost
qu’il ne soit en
leur pays.
Chevaulx las
Pour fortifier un cheval harassé, il luy font boire du vin
susdict par une corne, et il se trouve disposé pour faire encore
plus grande courvée.
Eau de vye
Les Irois ne boivent gueres de vin pource qu’ilz le convertissent
en eau de vye, de laquelle ilz usent presque aussy familiairement que nous
usons du vin.