070r - - - - - [continued]
Quand tu as moulé, il est bon de recuire ta forme sur la
fumée de la matiere que tu fonds, pource que le gect s’empraint
de la qualité deu metal, qui court aprés plus aysement en chose
qui tient de luy.
Les os d’homme sont les meilleurs pour gect estant calcinés.
Pour gecter net, il fault que ta matiere soict bien chaulde,
& pour cet effect, quand ta matiere est fondue, gectes y de
l’escaille de fer ou en pouldre, ou autrement, E car cela
eschaufe fort le cuivre & le nettoye de sa graisse. Sur
la fin, quand tu vouldras gecter, mects y un peu de
salpestre, pliant tes additions dans un papier affin que touls
ne cognoissent pas ce que tu y mesles.
Les os de pieds de mouton sont encores meilleurs que
ceulx de pied de bœuf.
L’huile & le suif font fort soufler, & le verre pilé & le cuivre seul.
La terre cendrée moule fort net.
La cendre n’ha pas assés de corps pour soubstenir le
cuivre.
Il est mieulx de ne mesler poinct les sables, mays d’emplir
le chassis d’ung seul.
Le laicton est tousjours gras & ne moule pas net. On trouve
qu’il vient mieulx estant allié d’un quart de cuivre, mays qu’il
soict gecté fort chault.
Le cuivre vient bien meslé d’un peu de metal. Mays si tu mesles
du metal parmy le laicton, il sera encores plus aigre & plus malaisé.
Le sable un peu grosset a plus de corps.
Le sable de corp rocher est tousjours meilleur, qui semble tuf en
lopins, qui ha beau grain & est fort delié & un peu gras. On le
pile, puys on le deseiche dans une poile sur le foeu jusques à ce
qu’il soit ne fume plus, puys on le passe par le tamis double &
subtil & on en moule.
at left middle margin
Le cuivre ou letton
ne peult pas venir
bien si la medaille
n’ha espoisseur
suffisante, & si elle
ne l’a, donne luy
en avecq de la cire.
at left middle margin
Aulcuns gectent
par un trou
faict au milieu
du revers de la
medaille.
at left middle margin
Aulcuns,
voulant
gecter grand
ouvraige de
letton y, meslent
parmy le sable
du verre pilé
pour donner
liaison à la
terre. Mays il
faict soufler,
et fault
reparer
l’ouvraige.
at left bottom margin
On mect bien
du plomb parmy
un grand
ouvraige pour
faire courre,
mays non pas
pour au petit
pour ce qu’il laisseroit
une crasse tout
aultour de
l’ouvraige.
[continued]