070r - - - - - [continued]
Quand tu as moule il est bon de recuire ta forme sur la
fumee de la matiere que tu fonds pourceque le gect sempraint
de la qualite deu metal qui court apres plus aysement en chose
qui tient de luy
Les os dhomme sont les meilleurs pour gect estant calcines
Pour gecter net il fault que ta matiere soict bien chaulde
& pour cet effect quand ta matiere est fondue gectes y de
lescaille de fer ou en pouldre ou autrement E car cela
eschaufe fort le cuivre & le nettoye de sa graisse Sur
la fin quand tu vouldras gecter mects y un peu de
salpestre pliant tes additions dans un papier affin que touls
ne cognoissent pas ce que tu y mesles
Les os de pieds de mouton sont encores meilleurs que
ceulx de pied de bœuf
Lhuile & le suif fort fort soufler & le verre pile & le cuivre seul
La terre cendree moule fort net
La cendre nha pas asses de corps pour soubstenir le
cuivre
Il est mieulx de ne mesler point les sables mays demplir
le chassis dung seul
Le laicton est tousjours gras & ne moule pas net on trouve
quil vient mieulx estant allie dun quart de cuivre Mays quil
soict gecte fort chault
Le cuivre vient bien mesle dun peu de metal Mays si tu mesles
du metal parmy le laicton il sera encores plus aigre & plus malaise
Le sable un peu grosset a plus de corps
Le sable de corp rocher est tousjours meilleur qui semble tuf en
lopins qui ha beau grain & est fort delie & un peu gras On le
pile puys on le deseiche dans une poile sur le foeu jusques a ce
quil soit ne fume plus puys on le passe par le tamis double &
subtil & on en moule
at left middle margin
Le cuivre ou letton
ne peult pas venir
bien si la medaille
nha espoisseur
suffisante & si elle
ne la donne luy
en avecq de la cire
at left middle margin
Aulcuns gectent
par un trou
faict au milieu
du revers de la
medaille
at left middle margin
Aulcuns
voulant
gecter grand
ouvraige de
letton y meslent
parmy le sable
du verre pile
pour donner
liaison ala
terre Mays il
faict soufler
Et fault
reparer
louvraige
at left bottom margin
On mect bien
du plomb parmy
un grand
ouvraige pour
faire courre
Mays non pas
pour au petit
pource quil laisseroit
une crasse tout
aultour de
louvraige
[continued]