068r - - - - - Tables fantasques
Tu peulx faire divers compartiments encochés & dans
iceulx mectre des poissons pains sur du carton simple au naturel
& avecq couleurs, & s’il te semble sur du papier argenté & bruny,
qui representera l’escaille, et aprés couvrir cela de corne de
lanterne bien claire. Cela mesmes peulx tu apliquer en aultres
ouvraiges.
Planter abres
Il les fault planter en lieu sec temps sec, & assembler force
terre au pied tout aultour, comme une motte, affin que les pluyes
ne remplissent les fosses & ne nyent les abres.
Gect
J’ay essayé 4 sortes de sables pour le plomb & estain, la croye,
le verre pilé, le tripoly, & le linge bruslé, touts 4 fort
excellents. Mays quand à la croye, il fault qu’elle soict de la plus
doulce que tu pourras trouver, comme est celle de Champaigne dont
usent les painctres. Elle despouille fort net, ne veult poinct estre
humectée de magistra ne d’aulcune chose, ains toute seiche, en son
naturel, subtillement pulverisé. Le premier gect est tousjours plus
nect, touteffois il en soustiendra bien deulx ou trois. Mays il n’y a
que le premier il fault que tu advises, quand tu vouldras
refaire ton moule au chassis, de prendre nouvelle pouldre de croye,
qui n’aye point esté mise en oeuvre, car celle qui ha servy au chassis
est desseichée & n’ha pas tant de prise & liayson que la recente.
Le verre pilé se peult faire en sable de verre commun, touteffois
le cristallin est plus excellent, car le commun ne tient que du verre
sel de salicor, mays le cristallin tient du sel de tartre & de salicor
tout ensemble, qui touts deulx servent à la fusion, le verre estant
calciné & reduit comme à sa premiere matiere. Or, pour le calciner
parfaictement, gectes tes lopins de verre quel qu’il soit entre les plus
gros charbons allumés que tu pourras, si aultre commodité tde foeut
violent te default. Et lorsqu’il sera bien rouge gecte le dans l’eau
at left middle margin
La potée est
estimée excellente
pour ces deulx
metaulx.
[continued]